VOV4.K’ho- Dơ̆ mìu ờ di kàl pa do tàm tiah tàm gùl lơgar mờ Tây Nguyên neh lơh gơbàn ờ dùl êt hoàc hươr. Mơya, tàm càr Kon Tum kơnờm geh dà mìu bơtơl bơh dơ̆ mìu do neh dong gah lơh broă sa sươn sre càr do sơrlèt gan tŭ tơngai ờ niam ngan rlau jơh bơh kàl prang Tây Nguyên dê.

Kơnờm bơh mìu ờ di kàl do mờ tơnau dơng dà hìu măy pờ tơlik ồs đèng geh tai uă dà

Jơnau yal bơh Anih yal tơngĭt lài trồ tiah dà ia càr Kon Tum dê pà gŏ, tàm dơ̆ mìu ờ di kàl do bơh ngai 31/03 tus ngai 01/04, tàm ù tiah càr Kon Tum neh geh mìu di mơ, mìu dờng, geh tiah geh mìu dờng ngan. Dà mìu ai khà dà tơl sùh ìo ai dùl dơ̆ tuh dà tờm chi tam in tàm gùl tơngai trồ prang dờng, dơ̆ mìu do gam gơguh pơgăp 25% khà dà ai 80 tơnau dơng dà, gĭt nđờ rhiang bơtơ̆t dơng dà mờ tơnau dà hìu măy pờ tơlik ồs đèng. Do là dơ̆ mìu ờ di kàl pa do neh bơtơl khà dà kwơ ngan ai lơh sa sươn sre bơh càr dê in mờ bal mờ dơ̆ mìu pa do gam lơh gơs geh tơl dà tuh ai tờm chi tam in tus tŭ nhai mìu nam 2022 ngan ngồn sơnđờm tus.

Cau mblàng Lơ Mu K’Yến