VOV4.K’ho - Tàm càr Kon Tum kòp lơh aniai tàm tờm kơnuh sơnơm Ngọc Linh tŭ do neh gơtờp uă, lơh hoàc huơr uă ngan bè lơh sa, tàm hơ̆ uă ngan là gơwèt mờ ală hìu làng bol kòn cau rơƀah geh rài kis hìu nhă gơtìp kal ke.

Ƀí thư Tỉñ ủy, Củ tịc HĐÑZ càr Kon Tum ồng Dương Văn Trang đơs bè bơta hoàc huơr bơh làng bol dê tŭ tờm kơnuh sơnơm Ngọc Linh gơtìp kòp

    Làng bol kis tàm xã Tê Xăng, kơnhoàl Tu Mơ Rông mờ tờm kơnuh sơnơm Ngọc Linh gơtìp kòp lơh aniai

Jăt jơnau kờp bơh bàr kơnhoàl Đăk Glei mờ Tu Mơ Rông, càr Kon Tum pà gŏ, tus tŭ do neh geh di pơgăp 50 rơbô tờm kơnuh sơnơm Ngọc Linh gơtìp kòp lơh aniai. Tàm hơ̆, khà tờm kơnuh sơnơm gơtìp kòp lơh aniai tàm kơnhoàl Đăk Glei là rơlao 10 rơbô tờm mờ kơnhoàl Tu Mơ Rông rơlao 39 rơbô tờm. Tềng đăp mờ bơta kòp lơh aniai tàm tờm kơnuh sơnơm Ngọc Linh gơtìp uă, lơh hoàc huơr uă bè lơh sa, tàm pơrjum dơ̆ 8, Mpồl đơng lam Đảng ƀộ càr khoă 16, Ƀí thư Tỉñ ủy, Củ tịc HĐÑZ càr Kon Tum ồng Dương Văn Trang neh “lùp” kơnòl gơwèt mờ Sở Nông nghiệp mờ Phát triển Nông thôn. Ồng Nguyễn Tấn Liêm, Kwang atbồ Sở do đơs là, sở neh rơcang tàm broă gơsơ̆t kòp tàm tờm kơnuh sơnơm Ngọc Linh. Bè bơta lơi lơh gơtìp kòp aniai tàm tờm kơnuh sơnơm Ngọc Linh, bơta tờm là suơn tam gơtìp kòp lơh chơ̆t uă, bơdìh hơ̆ tai geh ờ uă tờm gơtìp kòp ồm sa mờ kòp tềng ngko rơyas.

Cau mblàng Ndong Brawl