Nàng kờñ sơlơ tơnguh rlau tai broă lơh pơgồp bal sền sơ wì, jòi, rơcang sơndră, kơryan mờ lơh glài di tŭ ală broă lơh lơh aniai tus phan kuơ brê, mho ngai 28/10, tàm ƀòn dờng Kon Tum, Ủy ƀan Ñân zân ală càr Kon Tum, Quảng Nam, Quảng Ngãi bơyai lơh Pơrjum sền sơ wì cồng nha lơh jat kơrnuat pơgồp bal atbồ, sền gàr brê tiah rềp nhàr bơh 3 càr dê. Lơh jat kơrnuat pơgồp bal atbồ, sền gàr brê tiah rềp nhàr geh 3 càr kĭ, rlau 2 nam do, mpồl kiểm lâm 3 càr neh lam lơh rlau 1 rbô 200 dơ̆ lòt sền, jòi kup ală cau lơh aniai tus phan kuơ brê, git gŏ, lơh sră lơh glài 98 broă lơh tìs.

Kĭ kơrnuat pơgồp bal atbồ, sền gàr brê đah 3 càr

Ồng Hồ Quang Bửu, Phó Củ tịc Ủy ƀan Ñân zân càr Quảng Nam đơs nền, tơngai lài, ală mpồl lơh broă geh gơnoar 3 càr neh geh bơta pơgồp bal niam ngan tàm broă lơh atbồ, sền gàr brê tiah rềp nhàr. Tàm pơrjum, 3 càr neh kĭ wơl kơrnuat pơgồp bal sền gàr brê tiah rềp nhàr mờ ală tơngume ngan ngồn nàng sơlơ sền gàr mờ bơtàu tơnguh brê tàm tơngai tus.