VOV4.K’ho-Tàm càr Kon Tum tàm rlau 2 nhai do neh geh mờr 30 rơbô tờm kơnuh sơnơm Ngọc Linh gơtìp chơ̆t. Jơnau tờm gơbàn geh sền gĭt là tài bơh tu kòp lơh aniai mờ mìu piar.

Mìu piar lơh pă tờm kơnuh sơnơm Ngọc Linh tàm xã Măng Ri, kơnhoàl Tu Mơ Rông càr Kon Tum

Tơrgùm kờp bơh Ủy ƀan Ñân zân kơnhoàl Tu Mơ Rông, càr Kon Tum pà gŏ, tàm tiah tam kơnuh sơnơm Ngọc Linh 3 xã bơh kơnhoàl dê, tàm hơ̆ geh: Măng Ri, Tê Xăng mờ Ngọc Lây geh rlau 29 rơbô 100 tờm kơnuh sơnơm gơtìp chơ̆t tài bơh tu kòp lơh aniai. Tàm hơ̆ xã Măng Ri geh khà tờm kơnuh sơnơm chơ̆t hoàc huơr ngan rlau jơh mờ mờr 20 rơbô 200 tờm. Bơdìh hơ̆,  tàm 2 xã Măng Ri mờ Đăk Sao geh rlau 650 tờm kơnuh sơnơm chơ̆t tài bơh mìu piar. Jat cồng nha lòt sền, tu kòp lơh aniai uă ngan tàm tờm kơnuh sơnơm Ngọc Linh dùl nam tàm suơn ờng. Geh bă ù tam kơnuh sơnơm Ngọc Linh gơtìp kòp khà gơguh tus 30%. Ci Kụk tam phan mờ sền gàr phan tam càr Kon Tum kung neh geh jơnau tơngkah lài mờ làng bol nàng geh broă lơh rcang sơndră.

Cau mblàng K’Hạnh