VOV4.K’ho- Tàm càr Kon Tum kòp aniai tàm tờm kơnuh sơnơm Ngọc Linh tŭ do neh gơrề uă lơh hoàc huơr uă ngan bè lơh sa, ngan là gơ wèt mờ ală hìu bơnhă làng bol kòn cau dùl ết nă cau rƀah geh rài kis hìu bơnhă kal ke. Kơlôi sơnơng ngan bơh bơta hoàc huơr bơh làng bol dê, tàm pơrjum dơ̆ 8 Ƀan Cấp hàñ Đảng ƀộ càr khoă 16 pa geh Tỉñ ủy Kon Tum bơyai lơh, Bí thư Tỉñ ủy, Củ tịc Hội đồng Ñân zân càr Kon Tum neh lùp kơnòl gơ wèt mờ gah lơh broă geh gơnoar.

Dùl tờm kơnuh sơnơm Ngọc Linh gơtìp kòp

Hìu bơnhă bi Y Bắp, ơm tàm ƀòn Đăk Viên, xã Tê Xăng là hìu bơnhă tam uă ngan rơlau jơh kơnuh sơnơm Ngọc Linh kơhoàl Tu Mơ Rông, càr Kon Tum. Bi Bắp pà gĭt, tŭ tờm kơnuh sơnơm gơtìp kòp geh tềl tơngŏ sơnrờp ngan là nha gơtìp pàl halà ñòp, dus sền nggu ryas den bùm neh ồm dùl bơnah halà ồm jơh tơn. Broă tờm kơnuh sơnơm Ngọc Linh 1 nam geh giă tăc tàm drà kă bro pơgap 300 rơbô đong mờ tờm bơh 3 sơnam rlau hơ đang là gĭt nđờ tơlak đong. Bulah rơngòt ngan tŭ sền gŏ kơnuh sơnơm Ngọc Linh gơtìp chơ̆t mờ bơta do neh jŏ jòng uă nhai do, mơya hìu bơnhă bi Y Bắp kung bè ală hìu bơnhă làng bol ndai tàm ƀòn Đăk Viên kung gam kwi kwơ ngan tàm broă jòi broă sơm tu kòp tờm kơnuh sơnơm Ngọc Linh in. Bi Y Ƀắp đơs: Ờ gĭt sơm tu kòp lơh mbè lơi sơl? Làng bol dus bùm lơi mờ ồm den dus tờm kơnuh hơ̆ tam tàm rƀòng ndai ờ tam bal tai mờ sền gơ lơh mbè lơi. Mờ làng bol mìng gĭt broă lơh bè hơ̆ lơm he ờ gŏ gĭt lơh mbè lơi tai. Mìng dus tam tiah ndai bañ tam rềp tàm nggu ryas ờ gŏ ồm.

Bí thư Tỉñ ủy, Củ tịc Hội đồng Ñân zân càr Kon Tum ồng Dương Văn Trang đơs bè hoàc huơr bơh làng bol dê tŭ tờm kơnuh sơnơm Ngọc Linh gơtìp kòp aniai

Xã Măng Ri, kơnhoàl Tu Mơ Rông là tiah geh khà tờm kơnuh sơnơm Ngọc Linh gơtìp chơ̆t uă ngan rlau jơh mờ rlau 20 rơbô tờm. Nàng sơm tu kòp ai tờm kơnuh sơm in, Đảng ủy mờ gơnoar atbồ xã Măng Ri kung mìng pa ơm wơl tàm broă bơto pơlam làng bol bàr pe broă lơh bal hiă lơm, bè tìm bơh hơđăng bồ nàng tơrmù ƀà bơta ờ niam bơh trồ tiah dê gơ wèt mờ tờm kơnuh sơnơm. Ồng A Sỹ, Ƀí thư Đảng ủy xã Măng Ri, kơnhoàl Tu Mơ Rông, pà gĭt: Gơ wèt mờ tờm kơnuh sơnơm là mìu uă ir den gơ kung ờ kờñ sơl. Bol añ bơto pơlam làng bol là ai phan tìm bơh hơđang ai gơ in dùl ết dà mìu tàm tờm kơnuh sơnơm nàng tờm kơnuh sơnơm  ờ hoan gơtìp kòp aniai.

Tơr gùm kờp bơh kơnhoàl Đăk Glei mờ Tu Mơ Rông, càr Kon Tum pà gŏ, tus tŭ do neh geh pơgap 50 rơbô tờm kơnuh sơnơm Ngọc Linh gơtìp kòp aniai. Tàm hơ̆, ală tờm kơnuh sơnơm gơtìp kòp aniai tàm kơnhoàl Đăk Glei là rlau 10 rơbô tờm mờ kơnhoàl Tu Mơ Rông là rlau 39 rơbô tờm. Ci kụk tam phan mờ sền gàr phan tam càr Kon Tum kung neh geh jơnau bơto pơlam, tơngkah làng bol rcang sơndră mờ sơm tu kòp ai tờm kơnuh sơnơm in bè: jì wàs sàng goh nàng tơrmù ƀà gơdrơm bơsềt kòp lơh aniai; gơwèt mờ tờm gơtìp kòp den tam gơl tam phan tam ndai nàng tơrmù ƀà khà bơtờp; ngui broă lơh siñ họk chu pơr gŭc… Mơya, bơta geh ngan pà gŏ do kung mình là ală broă lơh tềng đap mat, ing lơm ờ hềt bơsong tơn jơh nàng bơta kòp aniai tàm tờm kơnuh sơnơm Ngọc Linh mờ làng bol kung gam kwi kwơ ngan tàm broă jòi broă sơm tu kòp tàm tờm kơnuh sơnơm Ngọc Linh nàng tơr mù ƀà bơta hoàc huơr bè lơh sa.

Làng bol xã Tê Xăng mờ tờm kơnuh sơnơm Ngọc Linh gơtìp kòp aniai

Tàm pơrjum dơ̆ 8 Ban Cấp hàñ Đảng ƀộ càr khoă 16 pa geh Tỉñ ủy Kon Tum bơyai lơh, Bí thư Tỉñ ủy, Củ tịc Hội Đồng Ñân zân càr Kon Tum ồng Dương Văn Trang pà gĭt, hoàc huơr bè lơh sa là dờng ngan, ngan là gơwèt mờ ală hìu bơnhă làng bol kòn cau dùl ết nă cau rƀah, rài kis hìu bơnhă kal ke. Ồng Dương Văn Trang đơs: Priă bơcri ai dùl tờm kơnuh dờng in mờ tiah tam tàm do uă ngan là tiah làng bol kòn cau dùl ết nă cau rƀah. Làng bol kòn cau dùl ết nă cau geh priă den blơi tam wơl tai, ờ geh priă jền den càn 50 tơlak, 100 tơlak đong bơh Ngân hàng Cíñ sác nàng blơi tam wơl tai. Tŭ do, ờ bơtoah là gơtìp kòp aniai, mờ kòp aniai bè do là roh jơh tơn, hoàc huơr jơh den.

Tềng đap kòp aniai tàm tờm kơnuh sơnơm Ngọc Linh gơ rề uă, lơh hoàc huơr uă ngan bè lơh sa mờ broă tam uă tờm lơh sơnơm kwơ màng mùl gŏ dờng màng bơh càr do dê, tàm pơrjum dơ̆ 8, Ban Cấp hàñ Đảng ƀộ  càr khoă 16, Bí thư Tỉñ ủy, Củ tịc Hội đồng Ñân zân càr Kon Tum ồng Dương Văn Trang neh lùp kơnòl gơ wèt mờ Sở Nông nghiệp mờ Phát triển Nông thôn. Ồng Nguyễn Tấn Liêm, Kwang atbồ Sở đơs là mpồl lơh broă neh rcang tàm broă sơm tu kòp tàm tờm kơnuh sơnơm Ngọc Linh. Bè jơnau tờm gơbàn gơlam tus kòp aniai tàm tờm kơnuh sơnơm Ngọc Linh, ồng Nguyễn Tấn Liêm pà gĭt: Bol añ neh sền gĭt là bơh 2 bơta bơsềt neh lơh gơlik kòp lơh tờm chi gơtìp chơ̆t. Sền wơl mờ cồng nha bơh tơngume kơlôi sơnơng rcang sơndră tu kòp lơh aniai tàm tờm kơnuh sơnơm Ngọc Linh bơh Sở Khoa học mờ Kông nghệ Kon Tum yal den sền gĭt là suơn gơtìp bơtờp kòp chơ̆t dùl ròt là uă ngan, bơdìh hơ̆ geh bàr pe tờm gơtìp kòp ồm tờm mờ ngko ryas. Sở kung neh geh jơnau tơngkah lài mờ pơyoa tus ală kơnhoàl nàng kơnhoàl in pơyoa ală xã nàng rcang sơndră kòp.

Ờ gơtùi ring bal ngan mờ jơnau mblàng lơh loh bơh kwang atbồ Sở Nông nghiệp mờ Phát triển Nông thôn dê, Bí thư Tỉñ ủy, Củ tịc Hội đồng Ñân zân càr Kon Tum ồng Dương Văn Trang đơs ngan, neh geh cau, geh tiah neh ờ rcang sền ngăc mờ ờ geh kơnòl tềng đap bơta hoàc huơr bơh cau tam kơnuh sơnơm Ngọc Linh dê gơlam tus kòp aniai gơrề uă lơh hoàc huơr uă ngan. Jơnau yal bơh gơnoar atbồ kơnhoàl Tu Mơ Rông dê, tiah tam kơnuh sơnơm Ngọc Linh tờm bơh càr Kon Tum dê kung pà gŏ, tơngai pa do gah lơh sa suơn sre càr neh tơngŏ bơta kwi kwơ tàm broă gròi sền kòp aniai tàm tờm kơnuh sơnơm Ngọc Linh.

Cau mblàng K’Hạnh