VOV4.K’ho- Nàng kờñ gàr niam gơnoar kuơ cau ngui sa dê, pơgồp bơnah bơsong bơta pơrlồm mat biap, kơnuh, plai chi VietGAP nàng tac tàm ală siêu thị, drà kă bro dờng tàm lơgar, Lâm Đồng gam sơlơ lòt sền, sền sơ wì kràñ ngan broă lơh atbồ anih lơh gơlik phan bơh suơn sre tàm càr. Lâm Đồng tŭ do geh rlau 5 rbô 700 lồ bă ù lơh sa suơn sre jat tơl khà VietGAP, gơguh mờr 320 lồ bă ù geh dờp tơl khà VietGAP pơn drờm mờ nam lài.

Lâm Đồng sền sơ wì kràñ ngan broă atbồ phan VietGAP

Jat ồng Nguyễn Hà Lộc, Phó Kwang atbồ Sở Nông nghiệp mờ Phát triển Nông thôn càr Lâm Đồng, tơngai rềp ndo, geh jơnau yal là ală phan biap geh blơi tàm drà bơh sơn rờp, tơnơ̆ hơ̆ geh ơn tàm kơldung, top mat VietGAP mờ tac tàm ală siêu thị tàm ƀòn dờng Hồ Chí Minh. Bơta do lơh gơ rềng tus pràn kơldang să jan, gơnoar kuơ cau ngui sa mờ bơngă pin dờn bơh mat kă bro biap Dà Làc- Lâm Đồng dê. Gah lơh sa suơn sre càr neh sơlơ tơnguh rlau tai mờ chồl pràn ală broă lơh lùp sền, gròi sền, sền sơ wì mờ jat sền nền nòn ală broă lơh lơh gơlik, tac bro phan bơh suơn sre VietGAP tàm càr, kràñ cê lơh glài ală bơta phan VietGAP ờ gàr tơl bơta niam.

VOV/Cau mblàng K’Duẩn