VOV4.K’ho– Sơrlèt gan mờ khà priă phơng gơguh uă, tŭ do, uă hìu làng bol lơh broă sa bal mờ hợp ták xã (HTX) tàm càr Gia Lai neh lơh is phơng hữu kơ bơh ală bơta phan geh lơh bơh broă lơh sa suơn sre, nàng sơnka sền gàr phan tam. Broă lơh do neh pà gŏ cồng nha geh bal tŭ tơmù khà priă tă blơi phơng hoá họk, mờ pơgồp bal tàm broă lơh kloh niam tiah kis ù mờ bơta kơl jăp bơh suơn tam phan dê.

                       Làng bol lơh is phơng hữu kơ tàm hìu, dong kờl tơmù khà priă blơi phơng

Tŭ do, HTX kă bro mờ broă lơh drơng ala Nam Yang, xã Nam Yang, kơnhoàl Đăk Đoa, càr Gia Lai pa lơh gơs 200 khối phơng hữu kơ bơh phơng kơnrồ, kơmhò kơphe, lơ̆ mờ ală bơta phan geh bơh hìu măi lơh gơs ngui sa bơh phan geh lơh bơh broă lơh sa suơn sre dê. Ồng Nguyễn Tấn Công, Củ tịc HĐQT HTX pà git, mờ rơlao 200 lồ tiêu bal mờ kơphe, pah nam HTX kờñ ngui geh di pơgăp 60 tấn phơng hoá họk. di lah kờp jăt khà priă phơng tŭ do, den priă tă geh tus rơlao 1 tơmàn đong. Nàng tềm pềr priă tă, bơh bồ nam tus tŭ do, HTX neh lơh broă bal mờ dùl nă cau jăk chài tus bơto tàm broă lơh phơng hữu kơ geh bơta niam uă bơh phan neh geh lài: “Lài do, bol añ neh geh tŭ lơh sơl, mơya lơh mờ hìu lơh broă sa. Mơya sền gŏ broă kờñ bal mờ phan gơlời bơh broă lơh sa suơn sre dê, ờ kas priă tai den tàng nam do là nam sơnrờp HTX ai lơh jăt broă lơh di pal rơlao nàng lơh uă tus mờ làng bol. Bè jŏ jòng, he bơtơl phan tam in khà đạm hữu kơ, phan gơlời bơh chi che, ai geh bơta mƀùr ù in. Tàm hơ̆ uă ngan là he ròng geh wơl vi sinh geh kwơ ù in, ai geh bơta sơndră mờ tu kòp geh is, ờ pal gơrềng tàm sơnơm sền gàr phan tam bè jŏ jòng”.

                                             Kơphe hòn gơs niam mờ geh uă plai

Ờ mìng ală HTX lơh sa suơn sre, mờ uă hìu làng bol tàm càr Gia Lai kung neh mờng mờ broă lơh is phơng hữu kơ nàng sơnka sền gàr phan tam, tơmù khà phơng hoá họk, tềm pềr priă tă tàm broă lơh. Lŏ Hoàng Thị Trúc, 43 sơnam, kis tàm ƀòn Brếp, xã Đăk Jrăng, kơnhoàl Mang Yang pà git, kơnờm mờ broă ngui phơng kơnrờ nàng lơh phơng vi sinh, hìu nhă lŏ tềm pềr di pơgăp 50 tơlăk đong priă blơi phơng hoá họk pah nam: “Tŭ do, phơng hoá họk blơi kas ngan priă, den tàng hìu geh phơng kơnrồ den pơgồp bal nàng ơn, geh cồng nha ngan. Nha tờm kơphe tơlir, ù mƀùr rơlao, niam rơlao pơn drờm mờ tŭ ờ ngui phơng kơnrồ. Ală cau tàm hìu, bơh oh mi, mè bèp ndrờm ngui phơng kơrnồ nàng ơn tàm suơn kơphe lơm”.

Ồng Nguyễn Mạnh Điệp, Củ tịc UɃÑZ xã Đăk Jrăng, kơnhoàl Mang Yang pà git, do là xã mìng geh broă lơh sa suơn sre, xã geh mờr 18 rơbô lồ phan tam ală bơta bal mờ phan ròng git nđờ rơbô nơm. Do là ală bơta ƀuơn nàng làng bol gơtùi lơh is phơng hữu kơ. Uă nam do, gah lơh broă sa suơn sre neh pờ uă ơdŭ bơto, bơto sồr, lam sồr làng bol lơh broă sa lơh is phơng hữu kơ bơh ală bơta phan neh geh lài tàm broă ròng phan, tam phan. Mùl màl pà gŏ, phơng hữu kơ geh cồng nha uă bơta, mờ priă tă nàng lơh 1 tấn tŭ do ờ hềt tus 2 tơlăk đong, mìng ndrờm mờ 1 bơnah 10 pơn drờm mờ blơi phơng hoá họk: “Ală hìu geh bơh 5 tus 7 nơm kơnrồ, làng bol, tàm hơ̆ uă ngan là làng bol kòn cau neh git ngui phơng bơh kơnrồ, ngui kơmhò kơphe, lơ̆, geh cau lòt tơwès tai ñhơ̆t màng lơh phơng hữu kơ, tơmù phơng hoá họk. Bol neh ai tơmŭt tàm kơrnoăt, ală ơdŭ bơto bơh mpồl cau lơh broă sa. 8 ƀòn tàm xã neh ngui broă lơh do, lơh is nàng ơn phan tam in tàm suơn hìu. Pa do, bol añ kung neh ai kwang bàng lơh broă tàm gah do tus bal broă lơh suơn, den geh uă phan tam neh hòn gơs niam, geh cồng nha uă”.

Ồng Lê Tấn Hùng, Phó kwang atbồ phòng Nông nghiệp mờ Phát triển Nông thôn kơnhoàl Đăk Đoa pà git, bơh bồ nam 2021 tus tŭ do, khà priă bơh uă bơta phan lơh sa suơn sre bè phơng sih, sơnơm sền gàr phan tam bal mờ xăng jờu ndrờm gơguh uă khà priă. Nàng tơmù bơta gơrềng bal bơh khà priă phan lơh broă sa suơn sre gơguh uă, ndrờm bal tàm broă tă priă lơh sa, den pal geh broă lơh jăt gùng dà broă lơh hữu kơ, kơl jăp gơwèt mờ phan tam. Tàm hơ̆, làng bol pal ai lài broă tuh dà tềm pềr, tam ñhơ̆t tàm suơn nàng gàr sùm bơta sùh mƀùr ù in. Gơwèt mờ phơng sih, ồng Hùng bơto sồr, làng bol ngui phơng hữu kơ nàng tơmù khà priă tă: “Tơngai do, càr bal mờ anih lơh broă tờm tàm kơnhoàl neh geh sră nggal bơto sồr sùm, lam sồr làng bol tơmù ờ uă ngan broă bơcri priă blơi phơng hoá họk, ai lài broă bơcri priă lơh phơng hữu kơ; ngui ală bơta phan geh hữu kơ tŭ do geh, ală phan jơnkah bơh broă lơh sa suơn sre, nàng ngui lơh, tơmù broă bơcri priă, tơnguh uă cồng nha broă lơh sa làng bol in”.

Tam gơl broă tam phan jăt broă lơh hữu kơ geh dong kờl làng bol lơh broă sa bơnah lơi tềm pềr priă tă tàm broă lơh sa tàm bơta khà priă phan lơh broă sa suơn sre sùm gơguh uă bè tŭ do. Lơh is phơng hữu kơ bơh ală phan jơnkah bơh broă lơh sa suơn sre mờ làng bol lơh broă sa càr Gia Lai gam lơh jăt pà gŏ geh cồng nha tàm bơta khà priă phơng hoá họk gơguh uă bè tŭ do. Mờ broă lơh do kung geh dong kờl làng bol lơh niam ù mờ gàr niam bơta kơl jăp suơn tam phan dê.

Cau mblàng ndong Brawl