VOV4.K’ho - Tơnơ̆ mờ 15 nam lơh jăt Nghị quyết Dà lơgar 07 khoă 10 bè lơh sa suơn sre, làng bol lơh sa, ƀòn lơgar tàm lơgar he neh geh uă cồng nha kwơ màng, geh kwơ uă ngan, tơrgùm bal, tơl ală bơta. Lơh sa, kă bro phan geh lơh bơh broă lơh sa suơn sre tam gơl pràn jăt broă lơh tơnguh uă bơta niam mờ bơta kwơ, gơdờp mờ tam gơl trồ tiah. Mơya, broă lơh jăt Nghị quyết tàm tơngai do gam ai tơngŏ geh uă bơta ờ pràn. Tàm pơrjum Dà lơgar 05, Ƀan cấp hàñ Đảng dà lơgar ne cri bơyai bè rơndăp broă tơn jơh 15 nam lơh jăt Nghị quyết Pơrjum Dà lơgar 07 khoă 10 bè lơh sa suơn sre, làng bol lơh broă sa, ƀòn lơgar. Jăt mờ hơ̆, broă kơlôi sơnơng, ngui khoa học-kông nghệ, tam gơl pa bơceh lơh, cau lơh broă geh bơta niam uă ờ hềt gơs bơta tờm nàng ai geh bơta pràn tơnguh bơtàu... bơta do pal geh tơlik Nghị quyết pa nàng pơn jăt tai tai ai tơngŏ gơnoar kwơ màng bơh broă lơh sa suơn sre, làng bol lơh sa, ƀòn lơgar gơwèt mờ broă tơnguh bơtàu dà lơgar.

                                                         Pơrjum Dà lơgar dơ̆ 5, khoă 13

Pơn jăt tai đơs tờm tus mờ bơngă broă, gơnoar kwơ màng bơh broă lơh sa suơn sre, làng bol lơh broă sa, ƀòn lơgar gơwèt mờ broă tơnguh bơtàu dà lơgar, Nghị quyết Pơrjum Dờng Đảng gùt lơgar dơ̆ 13 đơs loh: Chồl pràn broă lơh wơl lơh sa suơn sre, tơnguh bơtàu lơh sa suơn sre ƀòn lơgar pơgồp bal mờ bơ̆t bơtàu ƀòn lơgar pa. Tơnguh bơtàu lơh sa suơn sre gơs phan kă bro tơrgùm bal uă jăt broă lơh pa, ngui kông nghệ kao, tơnguh uă bơta kwơ gơguh mờ tơnguh bơtàu kơl jăp. Lam sồr tơnguh bơtàu lơh sa suơn sre tơlir, kloh, lơh sa suơn sre sinh thái, lơh sa suơn sre hữu kơ, lơh sa suơn sre kông nghệ cao, ngăc ngar, lơh sa suơn sre số, gơdờp mờ tam gơl trồ tiah. Pơn jăt tai lơh jăt broă lơh jăt jơnau kờñ dà lơgar bơ̆t bơtàu ƀòn lơgar pa jăt gùng dà broă lơh pơgồp bal mờ broă ƀòn drà jơh, lơh broă, kơl jăp. Lơh jăt broă bơ̆t bơtàu ƀòn lơgar pa tơnguh uă, ƀòn lơgar pa lam lài mờ bơ̆t bơtàu bòn lơgar pa tàm ƀòn. Bơ̆t bơtàu broă sền gàr tơl phan sa dà lơgar dê tàm bơta pa. Rơhời tơmù bơta ờ ndrờm bal bè broă geh dờp bơta niam chài rơgơi đah ƀòn drà mờ ƀòn lơgar, đah ală tiah ngài mờ ală mpồl cau tàm mpồl bơtiàn...

Tơlik nùs nhơm chờ tŭ pơrjum Dà lơgar 5 dơ̆ do cri bơyai bè ală broă kwơ màng bơh dà lơgar dê tàm hơ̆ geh broă gơrềng tus gah lơh sa suơn sre, làng bol lơh sa, ƀòn lơgar, ồng Nguyễn Trí Ngọc, Phó Củ tịc Tổng hội Lơh broă sa mờ tơnguh bơtàu ƀòn lơgar Việt Nam yal: “Bol añ kơ̆p kờñ Nghị quyết pa tơlik geh broă lơh ngan bơh ală mpồl lơh broă cíñ trị gơwèt mờ broă lơh sa suơn sre, làng bol lơh broă sa, ƀòn lơgar. Nàng Nghị quyết pa geh cồng nha, bol añ kơlôi là pal geh ală broă lơh pràn kơl dang. Mìng is bè gah lơh sa suơn sre đơs bal, gah tam phan đơs is bol añ gŏ pal geh lơh pràn bè lơh gơs adăt ù tiah tài thề cế bè ù tiah geh kwơ màng, ai geh gơwèt mờ broă tơnguh bơtàu lơh sa suơn sre, tàm hơ̆ kwơ màng là tơnguh bơtàu lơh sa suơn sre lơh gơs phan kă bro tŭ he tam gơl bồ tơngoh bơh broă lơh sa suơn sre tus mờ bồ tơngoh lơh sa suơn sre”.

Ai tơngŏ lơh sa suơn sre sùm là “ñjrong dong kờl” bơh lơh sa, tŭ ală cồng nha tàm gah lơh sa suơn sre, làng bol lơh sa, ƀòn lơgar neh pơgồp bal kwơ màng tàm ală cồng nha dờng màng, geh kwơ tàm rài bơ̆t bơtàu pa tàm tơngai pa do, Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan đơs là, tàm bơta tàm lơgar mờ dunia geh uă tam gơl dờng, kơnòl bơ̆t bơtàu mờ sền gàr dà lơgar tàm bơta pa geh ai pal tơnguh uă bơta niam tàm broă lơh jăt kơnòl tơnguh bơtàu lơh sa suơn sre, làng bol lơh broă sa, ƀòn lơgar. Kòp kovid-19 pa do là cơng tàng ai gŏ bè broă lơh ndrờm bal mờ rơcang lài bơh gah do dê tàm bơta pa. den tàng, nàng gàr geh jơnau kờñ tơnguh bơtàu kơl jăp, broă tam gơl gơs broă tơnguh lơh sa suơn sre pa gơs dùl broă pal geh lơh mhar mờ geh kwơ: “Nàng ai geh broă tam gơl pa pràn kơl dang mờ jŏ jòng bal mờ kơl jăp, kờñ ngan geh ală bơta ngăc ngar pa, ală nùs nhơm geh tìp mờ bơta pa bal mờ ală broă mờng chài tàm mùl màl jăt gùng dà bồ tơngoh gùt plai ù, broă lơh bơh ală tiah dê. Nùs nhơm bơceh lơh gơtùi bơh 1 nă cau mơya nàng lơh mờ mùl màl kờñ broă tus bal dùl nùs bơh uă cau geh tam pà bal jơnau kờñ do. Tàm broă tam gơl pa niam, ñhăp ñhar gah lơh sa suơn sre ờ gơtùi mìng geh 1 nă mờ pal geh broă tam pà bal, dong kờl bal bơh ală ƀộ, gah lơh broă dà lơgar mờ ală càr, ƀòn dờng, ală mpồl lơh broă, cau dùl nă să gơwèt mờ ală mpồl lơh broă bal tàm lơgar bal mờ lơgar bơdìh”.

Jăt ồng Lương Quốc Đoàn, Củ tịc Mpồl cau lơh broă sa dà lơgar Việt Nam yal, nàng làng bol tam gơl bơh bồ tơngoh lơh sa suơn sre tus mờ gah lơh sa suơn sre ală Mpồl pal rơcang ai làng bol lơh sa in geh tơl bơta ngăc ngar nàng tam gơl. Ờ gơtùi sồr làng bol tam gơl là tam gơl mơ, di lah kung gam geh bồ tơngoh bè lài mờ broă lơh bè lài do, ồng Lương Quốc Đoàn đơs: “Kờñ làng bol lơh broă sa tam gơl bồ tơngoh pal chồl pràn “broă kờñ tam gơl pa” bơh làng bol dê. Pal rơcang ai làng bol lơh broă sa in geh tơl bơta ngăc ngar nàng tam gơl mờ ờ gơtùi sồr làng bol lơh broă sa tam gơl là tam gơl mơ di lah kung gam ngui nùs nhơm kơlôi sơnơng lài do, broă lơh lài do den kal ke ngan nàng tơnguh bơtàu pràn. Bè hơ̆, ală kấp mpồl pal pơgồp bal nền nòn mờ ală ƀộ, gah lơh broă dà lơgar, ală mpồl lơh broă, ală mpồl lơh sa kă bro, ală mpồl tam klăc bal nàng ngui ală bơta ngăc ngar khoa họk; hòi jà geh ală bơta pràn bơto bơtê, bơtơl, rơcang ai cau tàm mpồl cau lơh broă sa suơn sre in geh tơl bơta ngăc ngar, tơl pràn nàng lơh tờm mờ tơnguh gơnoar lơh tờm. Tŭ làng bol neh git geh gơnoar lơh tờm bơh să tờm dê mờ tơnguh geh gơnoar den lơh sa suơn sre, làng bol lơh broă sa, ƀòn lơgar geh tơnguh bơtàu”.

Cau mblàng Ndong Brawl