VOV4.K’ho - Poh lài, tàm Hà Nội, Ƀộ Nông nghiệp mờ Phát triển Nông thôn (NN mờ PTNT) bơyai lơh pơrjum pờ tơlik tàm internet gùt lơgar lơh jăt Nghị quyết sồ 19 bơh Mpồl đơng lam Đảng dà lơgar khoă 13 bè lơh sa suơn sre, làng bol lơh broă sa, ƀòn lơgar tơngai tus nam 2030 mờ wèt tus nam 2045. Đơs tàm pơrjum, Ƀộ trưởng Ƀộ NN mờ PTNT ồng Lê Minh Hoan đơs loh: Làng bol lơh broă sa pal là cau tờm tàm bơta gơrềng bal đah lơh sa suơn sre-làng bol lơh broă sa-ƀòn lơgar.

                              Càr Dăk Lăk hòi jà bơcri priă tơnguh bơtàu lơh sa suơn sre kơl jăp

Lơh jăt Nghị quyết bè lơh sa suơn sre, làng bol lơh broă sa, ƀòn lơgar mờ broă lơh jŏ jòng tơnguh bơtàu lơh sa suơn sre mờ ƀòn lơgar kơl jăp, tơngai do, Ƀộ Nông nghiệp mờ Phát triển Nông thôn (NN mờ PTNT) pơgồp bal mờ Ƀan Tuyên giáo Dà lơgar, Ƀan Kiñ tế Dà lơgar, bơyai lơh bơsram, yal, lơh jăt Nghị quyết. Ală jơnau đơs tàm pơrjum neh tam pà bal ală broă mờng chài, ală broă lơh tơrlòng pa, geh cồng nha tàm broă tơnguh bơtàu lơh sa suơn sre, làng bol lơh broă sa, ƀòn lơgar nàng wèt tus jơnau kờñ bơ̆t bơtàu “Lơh sa suơn sre ƀòn brê bơnơm, ƀòn lơgar pa, làng bol lơh broă sa gơguh jăk”. Ồng Nguyễn Hồng Sơn, Kwang atbồ Viện khoa họk lơh sa suơn sre Việt Nam đơs là: “Lơh sa suơn sre, làng bol lơh broă sa mờ ƀòn lơgar geh broă lơh đềt mềr bal. Tơnguh bơtàu lơh sa suơn sre kung là ai geh bơta niam nàng tơnguh bơtàu làng bol lơh broă sa mờ ƀòn lơgar bal mờ sơlơ̆u wơl. Tàm Nghị quyết mờ Broă lơh jŏ jòng neh ai tơngŏ loh làng, khoa họk mờ kông nghệ ờ mìng geh kơnòl ai geh phan geh lơh mờ bơta kwơ uă, ai geh bơta pràn mờ gam geh kơnòl kwơ màng rơlao, hơ̆ là bơto bơtê cau lơh broă geh bơta niam uă. Bè đah Viện den geh pơgồp bal mờ ală mpồl lơh broă gơrềng bal mờ mpồl lơh sa kă bro bơyai lơh jăt broă tam jào broă gơguh jăk kỹ thuật kông nghệ kung bè bơto làng bol lơh broă sa jăt broă lơh nền nòn rơlao nàng chồl pràn broă ngui kông nghệ kao tàm broă lơh sa suơn sre, bơh tŭ hơ̆ tơnguh bơta kwơ bơh phan geh lơh mờ ai geh bơta pràn tàm broă lơh sa suơn sre”.

       Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan geh jơnau đơs tàm pơrjum

Pa do, tàm dơ̆ “Lơh chờ sầu riêng Krông Păc dơ̆ sơnrờp nam 2022”, UɃÑZ kơnhoàl Krông Păc, càr Dăk Lăk neh bơyai lơh “Pơrjum hòi jà bơcri priă mờ tơnguh bơtàu phan geh lơh bơh broă lơh sa suơn sre, lơh sa suơn sre kơl jăp nam 2022”. Đơs tàm pơrjum, ồng Trần Hồng Tiến, Ƀí thư Huyện ủy Krông Păc pà git, kơnhoàl geh rơlao 53 rơbô lồ ù lơh sa suơn sre, 6 rơbô 100 lồ ù geh dà ngui, do là bơta pràn nàng kơnhoàl hòi jà bơcri priă tàm gah lơh sa suơn sre. Bơta geh tàm gah lơh sa suơn sre kơnhoàl gam uă ngan. Den tàng, kơnhoàl kơ̆p kờñ pơn jăt tai geh hòi jà bơta pràn bơcri priă, pơgồp bal tàm broă chồl pràn broă lơh sa mpồl bơtiàn tơnguh bơtàu. “Bol añ geh dong kờl ai ală mpồl lơh sa kă bro in bè sră nggal nàng ală mpồl lơh sa kă bro geh lơh sră nggal mhar ngan, niam ngan. Dơ̆ bàr, bol añ kung đơng lam ală xã, thị trấn tŭ ală cau bơcri priă tus bol añ geh dong kờl uă ngan bè broă tơm ntrờn ù tiah tŭ ală cau bơcri priă kờñ tus mờ tiah lơi bol añ dê nàng bơcri priă”.

Bơh tàm bơta mùl màl kơnhoàl dê, ồng Cao Văn Cường, Kwang atbồ Sở Nông nghiệp mờ Phát triển Nông thôn càr Thanh Hoá pà git: “Ală Ƀộ, gah lơh broă Dà lơgar neh di tŭ tơlik geh ală sră nggal, dan mờ Ƀộ gờñ yal mờ Thủ tướng Cíñ phủ tơlik broă lơh, tŭ geh broă lơh den ală càr, ƀòn dờng geh lơh jăt di pal nàng lơh jăt kơnòl tàm ù tiah gùt lơgar, di pal mờ bơta geh bơh tơl càr dê. Gờñ tơlik Nghị định sồ 57 bè broă hòi jà mpồl lơh sa kă bro bơcri priă tàm gah lơh sa suơn sre-làng bol lơh broă sa-ƀòn lơgar, tàm tơngu me hơ̆ càr Sơn La geh Nghị quyết di pal mờ bơta geh, lam sồr mpồl lơh sa kă bro bơcri priă lơh sa suơn sre, làng bol lơh broă sa, ƀòn lơgar”.

Đơs tàm pơrjum pờ tơlik tàm internet gùt lơgar lơh jăt “Nghị quyết sồ 19 bơh Mpồl đơng lam Đảng dà lơgar khoă 13 bè lơh sa suơn sre, làng bol lơh broă sa, ƀòn lơgar tơngai tus nam 2030, Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan đơs loh: tàm broă lơh bal đah lơh sa suơn sre, làng bol lơh broă sa, ƀòn lơgar pal ai loh gơnoar, bơngă tờm làng bol lơh broă sa tàm broă ai geh cồng nha bơh broă tơnguh bơtàu lơh sa suơn sre, ƀòn lơgar. Ală mpồl lơh broă gơwèt Ƀộ mờ Sở Nông nghiệp mờ Phát triển Nông thôn ală càr, ƀòn dờng lơh jăt, lơh jăt kơnòl, broă lơh bơh broă tơnguh bơtàu lơh sa suơn sre kơl jăp mờ ală broă lơh mùl màl nàng lơh jăt Nghị quyết bè lơh sa suơn sre, làng bol lơh broă sa, ƀòn lơgar: “Broă lơh nàng lơh mùl màl jơh ală kơnòl Cíñ phủ nàng lơh jăt Nghị quyết. Nghị quyết ha là broă lơh jŏ jòng ờ di là jơnau kờñ mờ là geh tàm broă lơh. Nàng lơh geh bơta do, ală mpồl lơh broă bơh Ƀộ mờ ală càr, ƀòn dờng pal lơh jăt nền nòn tàm broă lơh mờ tam gơl pa bồ tơngoh kơlôi sơnơng tàm gùng dà broă lơh”.

Lơh sa suơn sre tàm uă nam tơn geh đơs tus bè là gah lơh broă lơh kwơ màng bơ̆t bơtàu lơh sa dê. Cồng nha tàm gah lơh sa suơn sre, làng bol lơh broă sa, ƀòn lơgar neh pơgồp bal tàm cồng nha dờng màng, geh kwơ bơh rài tam gơl pa neh geh tàm tơngai pa do. Gùng dà wèt tus broă lơh sa suơn sre ƀòn brê bơnơm, ƀòn lơgar pa, làng bol bol lơh broă sa gơguh jăk mờ Pơrjum dờng dơ̆ 13 neh ai, den tàng sồr pal tơnguh tai uă gùng dà, broă lơh pràn kơl dang pa nàng chồl pràn broă tơnguh bơtàu bơh lơh sa suơn sre, làng bol lơh broă sa, ƀòn lơgar.

Cau mblàng Ndong Brawl