Tàm ală ngai do tàm pah dơ̆ àng drim tàm anih ơhò ơm Phan Thiết, sơnah ƀòn Phan Thiết, càr Lâm Đồng hô hơng ngan tŭ geh dồ ròt ơhò ka tus. Pah ngai anih tăc ka dờp gĭt nđờ jơ̆t tấn ka dà lềng mờ uă ngan ka nụk.

Bulah bơta kwơ lơh sa ờ uă, giă tăc uă ka nục tàm anih tăc ka mìng tam gơl bơh 10 tus 15 rơbô đông dùl kĭ mơya mờ khà dờng, làng bol lơh ka kung gam geh priă lơh geh bè ờs sơl. Bơh bồ nam tus tŭ do, Anih tăc ka Phan Thiết neh dờp rlau 15 rơbô tấn ka dà lềng kŭp tàm tiah dà lềng ngài mờ àr bơh 15 tus 20 hải lý. Ală phan tàm dà do dong làng bol lơh ka rcang priă jền ngui tàm rài kis, bơcri priă lơh sa, geh tai bơta gơn kơnờm nàng lòt tàm dà lềng kŭp ka, sền gàr tiah kŭp ka ờs mờng.