Ngai 16/10, tàm Hà Nội, Ƀộ Broă lơh sa suơn sre mờ Tiah ơm kis bơyai lơh Pơrjum sền sơwì cồng nha bơtàu tơnguh phan bơna OCOP mờ lòt nhơl ƀòn lơgar tơngai bơh nam 2021-2025, pơlam gùng dà tơngai bơh nam 2026-2030. Pơrjum đơs nền, broă lơh “Tơl sàh dùl phan bơna OCOP” mờ broă lơh lòt nhơl ƀòn lơgar neh gơ gơs bơta gơn kơnờm kwơ màng dong “lơh kah wơl” bơta ƀuơn bơta pràn niam chài, ù tiah, kòn bơnus tàm ală tiah ƀòn lơgar. Jat hơ̆, broă lơh neh lơh geh bơta tam gơl pràn tàm lơh broă sa suơn sre, bơh lơh dềt rah rài tus ală anih lơh bal geh kwơ; lơh geh tiah tam phan sùm, sơlơ tơnguh tai sơnđờm mut lơh broă, bơtàu tơnguh gah broă ƀòn lơgar dê, pờ geh tŭ tơngai niam lơh broă sa ai làng bol jơi bơtiàn dồ ết nă cau mờ cau ùr ƀòn lơgar. Tŭ do jơh gùt lơgar geh rlau 17 rơbô 300 phan bơna OCOP, rlau 600 broă lơh lòt nhơl broă lơh sa suơn sre bal mờ 400 tiah lòt nhơl ƀòn lơgar geh dờp.

Tàm pơrjum, ală cau ala mat đơs là: tềng đăp jơnau sồr pa bè bơtàu tơnguh lơh sa tơlir, tam gơl sồ, tơrmù ƀà tuh nhơm bơ̆ lik bơdìh mờ gơdờp mờ tam gơl nhơm trồ tiah, pal geh ală broă lơh tam gơl pràn, gĭt tus mờ bơta pa ngan rlau tai tàm bơtàu tơnguh phan bơna OCOP mờ lòt nhơl ƀòn lơgar. Broă lơh OCOP mờ lòt nhơl ƀòn lơgar tơngai bơh nam 2026-2030 geh kơ̆p gơn gơ gơs broă lơh tam gơl pràn tàm rơndăp tăp sèng wơl lơh sa ƀòn lơgar, pơgồp bơnah tơnguh uă priă lơh geh, bơtàu tơnguh rài kis làng bol, mơkung sền gàr bơhiàn niam chài mờ ù tiah hàng niam ƀòn lơgar Việt Nam dê.