VOV4.K’ho- Phan lơh gơs bơh suơn sre là phan tac hờ lơgar ndai tờm ngan bơh càr Gia Lai dê, mờ priă lơh geh 500 tơlak dolar Mỹ pah nam mờ gam ngai sơlơ gơguh jơnhua. Bơta do gơtùi geh là kơnờm tàm uă nam do, càr neh gròi sền tus broă bơt bơtàu, rề ơnàng ală tiah tam phan, lơh gơlik phan bơh suơn sre jat ală tơl khà geh dờp.

Kơphe là phan lơh gơs bơh suơn sre tờm ngan càr Gia Lai dê

Jat jơnau yal bơh Sở nông nghiệp mờ Phát triển Nông thôn càr Gia Lai dê, tŭ do, kờp jơh bă ù sih tam phan gùt càr kờp dŭ geh 557 rbô 700 lồ. Tàm hơ̆ geh 230 rbô lồ, ndrờm mờ 41% bă ù geh tam jat ală tơl khà bè VietGAP, GlobalGAP, 4C, Organic, Rainforest Aliance. Ồng Lưu Trung Nghĩa, Kwang atbồ Sở Nông nghiệp mờ Phát triển Nông thôn càr Gia Lai pà git, 2, 3 bơta phan bè kơphe, plai màk bơh càr dê neh gơtùi mut tàm ală drà kă bro kal ke bè Nhờk, EU. Jat broă rơndap lơh, tơngai bơh nam 2022 tus nam 2025, càr geh tơnguh bă ù chi tam jat tơl khà geh dờp mờr 5 rbô lồ pah nam, tơnguh bơta niam phan lơh gơs bơh suơn sre drơng tac hờ lơgar ndai in nàng kờñ tơnguh priă jền lơh geh ai cau lơh broă sa in.

VOV Tây Nguyên- Cau mblàng K’Duẩn