Àng drim gờñ tơnơ̆ mờ mìu càl dờng, hìu kấp 4 pa geh ùr bơklao lŏ Nguyễn Thị Xuân tàm thôn Hoà Mỹ, sàh Xuân Cảnh tìm wơl mờ 35 tơlăk đong priă tềm pềr tàm dùl nam neh gơtìp gơpồ jơh rơkàng. Ờ thàn moăt, bàr nă ùr bơklao lŏ neh tơrgùm, sơndră wơl tơl kơlik hìu gam gơlời nàng geh anih ơm tŭ trồ tiah mìu tơngai. Nùs nhơm chờ hờp mờ ram tŭ lŏ dờp geh jơnau yal rơ̆p geh dong kờl 10 tơlăk đong priă bơh sàh dê nàng lơh wơl rơkàng hìu. “Tŭ do, lài ngan là pal blơi kiă nàng tìm 2 nơm hìu hờ đang lài. Bàr nơm hìu hờ đang geh anih ơm lài, gam tai rơhời lơh tơnơ̆, geh priă den lơh tai, di lah ờ geh den lời ing tơnơ̆”.

Ờ mìng hìu làng bol, phan bơna kwơ màng kung gơtìp aniai uă ngan sơl. 81 ñjrong đèng gơtìp pă, mờr 400 rơbô nă cau gơtìp chơ̆t ồs đèng. Gah lơh ồs đèng ni sơna lơh mờr 900 nă, rơlao 50 phan lơh broă, tam pà bal cau lơh gùt mang. Pe ngai tơnơ̆, ồs đèng neh geh wơl jơh tàm tiah Đah măt tơngai lik. Ồng Trần Văn Thuận, Kwang Lam bồ Kông ty Ồs đèng Dăk Lăk pà git: “Tơngai lơh bol añ dê geh ai là tàm 3 ngai pal geh ồs đèng wơl tàm 100% cau ngui in tàm tiah Đah măt tơngai lik”.

Tàm ală hìu bơsram, rơlao 70 jơdŭ bơsram, 26 nơm hìu bơsram gơtìp gơpồ rơkàng, bơcah krơh. Mò Nguyễn Hồng Huệ, Lam bồ Hìu bơsram Mầm non Xuân Quang 1, do là dùl tàm ală hìu bơsram gơtìp aniai uă ngan tàm sàh Phú Mỡ pà git, ờ kơ̆p tàm jơnau sồr, cau pơgru, cau mè bèp kơnòm bơsram bal mờ mpồl ling, kwang àng tàm sàh neh mhar tus nàng bơsong wơl bơh bơta gơlời mìu càl dờng lơh. “Hòi jà ală mpồl bơh mpồl ling, kwang àng tus dong kờl hìu bơsram in, mờ ală broă lơh nàng lơh gơs wơl kloh niam tiah kis nàng ală kơnòm in geh lòt bơsram wơl niam”.

Mang mìu càl dờng pràn lơh gơtìp uă hoàc huơr, den tus trồ àng, mpồl lơh broă lài ngan tàm ală sàh càr Dăk Lăk dê neh tus mơ tàm ală thôn, ƀòn gơtìp hoàc huơr uă. Mpồl kảñ sát sơndră mờ crùh ồs sa bal mờ dong kờl cau gơtìp rềs àr neh ai rơkì, che dong klàs, phan lơh broă, măi mok ntrờn làng bol mờ dong kờl lơh wơl hìu đam. Thượng tá Phạm Ngọc Vinh, Phó Lam bồ cơl dŭ lơh broă Kảñ sát rơcang sơndră mờ crùh ồs sa bal mờ Dong kờl cau dong kờl rềs àr gơwèt Kwang àng càr Dăk Lăk pà git: “Tŭ mìu càl dờng lòt gan, mpồl Kảñ sát rơcang sơndră mờ crùh ồs sa bal mờ Dong klàs cau gơtìp rềs àr càr pơgồp bal mờ ală mpồl lơh broă gơrềng bal ai git nđờ rơhiang nă kwang bàng bal mờ phan lơh broă tus tàm ală thôn, ƀòn nàng dong kờl làng bol. Lài ngan là tơrgùm bơsong wàs chi che nàng geh gùng lòt, ală hìu bơsram, dong kờl ală làng bol cau kra ơm is, ală hìu geh sră dong kờl bơh mpồl bơtiàn, ală hìu neh gơtìp tơrlah, gơpồ rơkàng nàng dong kờl làng bol bơsram tơnơ̆ mìu càl dờng”.

Jăt jơnau kờp lài ngan, hoàc huơr gùt càr rơlao 2 rơbô tơmàn đong. Càr tă rơlao 80 tơmàn đong nàng dong kờl mơ ai ală hìu geh cau gơtìp chơ̆t, hìu tơrlah, hìu gơpồ rơkàng; mờ hòi jà mpồl kwang àng, ling klàng tus tơl thôn, ƀòn kờp wơl rơkàng sơlo, lơh wơl hìu ing, tơl niam dà ngui sa, sơnơm, rơcang kòp gơtờp. Củ tịc Anih duh broă Làng bol càr Dăk Lăk ồng Tạ Anh Tuấn đơs nền: “Do là jơnau lòng gơwèt mờ gơnoar atbồ ƀòn lơgar bàr kấp tàm broă rơcang drơng mờ rềs àr bơh trồ tiah. Bol añ gŏ gơnoar atbồ bàr kấp tàm tŭ gơtìp kal ke do neh di tŭ rơlao, tus tơn rơlao mờ mùl màl geh cồng nha rơlao. Tŭ do gam tơrgùm bơsong gùng lòt, ồs đèng, sơnơm nàng bañ lời gơtìp kòp gơtờp, mờ dong kờl hìu gơtìp tơrlah, gơpồ rơkàng nàng kờñ kơl jăp wơl rài kis”.

Tàm dơ̆ lòt sền mùl màl, Phó Thủ tướng Cíñ phủ ồng Mai Văn Chính neh gŏ broă rơcang lài, jal mhar bơh càr Dăk Lăk dê, tàm hơ̆ uă ngan là tàm broă ntrờn làng bol bơh tiah gơtìp uă di tŭ, mpồl kwang bàng, ling klàng, ồs đèng tus tàm ală thôn, ƀòn mhar ngan tơnơ̆ mìu càl dờng. “Ala măt Cíñ phủ, Thủ tướng Cíñ phủ añ pơn jờng càr Dăk Lăk, rơcang lài, tus bal tàm broă drơng mờ mìu càl dờng sồ 13. Añ gŏ mpồl lơh ồs đèng, kwang àng, ling klàng tus dong kờl nàng koh ală tờm chi gơtìp pă, hơ̆ sồng hìu đam ai làng bol in, hơ̆ sồng ală hìu bơsram, ală oh mi neh lơh niam. Sồr ală oh mi sền wơl tai, kờp tơl hoàc huơr nàng geh jơnau dan dong kờl priă nàng bơsong”.

Mìu càl dờng sồ 13 tus mhar ngan, bơta pràn lơh aniai uă, là bơta lòng neh geh sền gŏ bơh gờñ gơwèt mpồl lơh broă cíñ trị bal mờ làng bol càr Dăk Lăk dê. Bơh bơta lòng do, bơta pràn bơh mpồl lơh broă gơnoar atbồ ƀòn lơgar bàr kấp neh ai tơngŏ, hơ̆ là yal lài di bè mìu càl dờng; lơh broă rơcang lài, tus tơn, mhar niam, dong kờl làng bol. Do là dùl bơta niam ai tơngŏ nàng càr tơnguh, pơn jăt tai sơrlèt mờ ală bơta lòng ndai tàm gùng dà broă bơ̆t bơtàu dùl mpồl lơh broă gơnoar atbồ ring bal, geh cồng nha.