VOV4.K’ho- Lơgar he geh bơta ƀuơn bè phan lơh gơs bơh suơn sre li la, uă phan bơkah jat ù tiah,… gam là dùl bơta pràn. Mơya nàng tac phan do ngai sơlơ kơ̆ kơljap den jơnau sồr ai tơlik gơ wèt mờ cau lơh broă sa, hợp tak xã, mpồl lơh sa kă bro là pal bơto tơl làm bơta chài tac phan bơna tàm anih sồ, anih tac bro điện tử.

Lơh gơlik, tac hờ lơgar ndai phan bơh suơn sre tàm ală nam rềp ndo sùm lơh gơs ală bơta gơguh uă pa. Jat hơ̆, tơngai lài, broă dà lơ we Việt Nam tac sùm tus EU, Mỹ; pơ ò Sơn La tac gơtùi tus ală drà kă bro kal ke bè Anh, Australia; sầu riêng Dăk Lăk tac uă jat sră pơrgon tus drà kă bro lơgar Lo, plao gơ àl Lục Ngạn, càr Bắc Giang geh đơs niam ngan tàm Nhờk, Tây… ai gŏ ală broă lơh bơt bơtàu, bơtàu tơnguh mat kă bro, hòi jà blơi phan lơh gơs mờ kuơmàng là broă yal jơnau tơnggit drà kă bro ai làng bol lơh broă sa in gam lơh geh cồng nha.

Phan bơh suơn sre Việt Nam dê li la ngan

Mơya ală cồng nha do ờ hềt ndrờm mờ broă bơtàu tơnguh drà kă bro kơ̆ kơljap, tài mùl màl kal ke tŭ jòi git bè phan lơh gơs bơh suơn sre, phan bơka ală tiah dê tài kông nghệ lơh gơlik gam ờ hềt niam, lơh gơlik kal ke ai broă tac phan in, tài tơngai prap gàr lơyah. Bal mờ hơ̆, broă jòi git ai phan lơh gơs bơh suơn sre mut tàm anih kă bro điện tử ờ ƀuơn dùl êt lơi, tài jơnau git wă bơh mpồl lơh sa kă bro dê mờ broă lơh tac bro do gam ờ hềt uă. Mò Đinh Tuyết Nhung, Củ tịc Mpồl tam klac Hợp tak xã lơh sơnơm suơn sre mờ mpồl bơtiàn Bắc Kạn đơs bơta geh ngan: “Phan lơh gơs bơh suơn sre geh tŭ tơngai prap gàr lơyah, mờ mpồl kung ờ hềt geh rùp hin kung bè broă rơndap lơh tac bro nàng gơtùi geh dùl rơndap broă lơi ngan ngồn lơi nàng jòi git bè cau blơi den tàng broă kă bro mờ khà phan tac tàm anih kă bro điện tử ờ hềt uă. Bol hi kơp kờñ gơnoar atbồ geh ală broă lơh ngan ngồn nàng dong kờl ală mpồl mờ gơtùi ai ală phan bơna mut tàm anih kă bro dờng”.

Nàng lơh gơlik anih blơi kơ̆ kơljap sùm ai ală phan lơh gơs bơh suơn sre in, pal bơt bơtàu gơtùi mat kă bro ai phan bơna in, bơt bơtàu rùp hin mpồl lơh sa kă bro. Bal mờ hơ̆ là sền gròi uă rlau tai tus măi mok lơh gơlik phan bơh suơn sre kung bè geh broă lơh gơ hòi gơ jà mpồl lơh sa kă bro lơh gơlik phan nàng tơnguh bơta kuơ phan bơh suơn sre.

Pal bơt bơtàu gơtùi mat kă bro ai phan lơh gơs bơh suơn sre in

Ala mat anih kă bro tàm điện tử Postmart.vn ồng Nghiêm Tuấn Anh, Tổng Kông ty Ƀưu điện Việt Nam pà git, bơh anih logistics, anih kă bro tàm điện tử bơh Ƀưu điện Việt Nam dê neh geh uă khà sầu riêng tac tus lơgar Mỹ, plai gơ àl tac tus Nhờk, câu Âu… Tàm tŭ tơngai bơtàu tơnguh bơh kă bro tàm điện tử dê, broă bơto bơta chài, niam chài boh bơr tàm anih sồ ai làng bol lơh broă sa in là kuơmàng ngan: “Bol he geh uă ngan bơta plai chi bơkah, niam ngan, gơtùi geh tac uă tàm drà kă bro tàm lơgar mờ dunia. Tŭ do, làng bol lơh broă sa tàm tiah kơh bơnơm, tiah ƀòn lơgar, kông nghệ thông tin ờ hềt bơtàu tơnguh ndrờm mờ ală càr, ƀòn dờng tiah tờm. Den tàng, broă bơto bơta chài ai làng bol lơh broă sa in, bol hi sền hơ̆ là broă lài ngan nàng lơh geh cồng nha ai kă bro tàm điện tử in. Bè hơ̆ den tàng bol hi ờ mìng ơm wơl tàm broă bơto bơtê cau lơh broă sa in bơta chài tơmut phan tàm anih kă bro điện tử, ngui phan khi dê mờ gam bơta jơh ală bơta chài tàm anih sồ tai”.

VOV1 - Cau mblàng K’Duẩn