VOV4.K’ho - Kis tàm tiah kơh bơnơm, mơya klao pơnu Phạm Thế Hùng 25 sơnam, kis tàm xã Cư Né, kơnhoàl Krông Búk, càr Dăk Lăk lơh geh cồng nha broă ròng ka Koi lơgar Nhờk. Tŭ do bi gam geh 3 tơnao dà dờng ròng ka Koi ơnàng git nđờ rơbô thơ̆k vuông, geh priă cồng rơlao 1 tơmàn đong pah nam.

Tŭ do, pah nhai klao pơnu kis tàm ƀòn dờng tiah kơh bơnơm Phạm Thế Hùng jòi geh bơh 50 tus 100 tơlăk đong bơh broă ròng ka Koi

Đơs bè broă mŭt lơh broă, bi Phạm Thế Hùng, kis tàm xã Cư̆ Né, kơnhoàl Krông Búk yal, tơnơ̆ mờ tŭ neh jơh bơsram kấp 3 tàm nam 2015, ala mờ broă lòt bơsram đại học, bi neh rơwah bơsram broă lơh niam rơndeh Honda hơ̆ sồng lơh hìu lơh niam wơl rơndeh Honda tềng hìu. Geh nùs nhơm kờñ gơboh mờ ka Koi lơgar Nhờk, ală tŭ ru, bi sùm sền tàm internet nàng git bè broă ròng ka, hơ̆ sồng tăc rơndeh Honda bơh să tờm nàng blơi ka cèng ròng. Tài ờ git tàm broă ròng, 2 dơ̆ ròng ka lài ngan ndrờm gơtìp chơ̆t jơh.

Ờ di mờ broă ròng, bi Hùng neh tus ală hìu ròng ka tàm ƀòn dờng Hồ Chí Minh, càr Đồng Nai... nàng bơsram broă mờng chài mùl màl. Geh priă, geh jơnau git wă, bi ơm tơn broă lơh niam wơl rơndeh Honda, hòi jà mè bèp càn priă bơh ngân hàng 120 tơlăk đong nàng bơcri tàm broă lơh tơnao ròng ka Koi. Dơ̆ do, ka geh dờng niam mờ deh kòn ndrờm bal.

Broă mŭt lơh ròng ka Koi geh cồng nha bơh Phạm Thế Hùng neh mờ gam geh nùs nhơm kờñ bơh ală klao pơnu kis tàm do kờñ mŭt lơh broă

Bi Phạm Thế Hùng pà git, nàng ròng ka Koi geh cồng nha, bơta tòm là dà pal kloh niam, tiah lơh tơnao dà ròng ka pal kloh, ờ geh bal càl khồm gan; kwơ mjàng là pal rơcang sơndră mờ kòp bơsềt geh tàm ka. Tơnơ̆ mờ 2, 3 nam mŭt ròng ka, tŭ do bi neh geh 3 tơnao dà ròng ka ơnàng 12 rơbô thơ̆k vuông tàm ală càr Dăk lăk, Kon Tum mờ Lâm Đồng. “Tŭ do den añ tăc ndrờm bal pah nhai bơh 5 tạ tus 1 tấn ka, ờ kờp ală khà priă bơcri den gam priă cồng bơh 50 tus 100 tơlăk đong tàm 1 nhai. Kờp dŭ tàm tơngai tus, añ geh lơh tai gah broă lơh ƀlàng suơn, tơnao ròng ka mờ ù chi che niam, lơh hìu tăc dà kơphe ka Koi nàng cau năc tus sền, mờ di lah kờñ blơi den lơh tơn nàng tơnguh khà priă. Lơh ală broă lơh tơnao dà ròng ka, ƀlàng suơn”.

Bơh cồng nha neh geh să tờm dê, tŭ do bi Phạm Thế Hùng ờ mìng ai broă lơh ală ơruh pơnu tàm ƀòn in, mờ tŭ lơi kung rơcang bơto sồr, dong kờl ală bơyô kờñ lơh jăt sơl. Bi Nguyễn An Khánh, kis tàm ƀòn Katy 5, xã Cư̆ Né, kơnhoàl Krông Búk yal: “Lơh broă mờ bi Hùng den bi tơm priă nhai bơh 4 tus 6 tơlăk đong tàm 1 nhai. Añ gam bơcri priă nàng lơh tơnao dà, rơkàng mờ phan sơnkroh dà..., lồi nhai 4 nam do, añ geh mŭt ngui hìu lơh broă ka Koi añ dê. Kờp jơh khà priă bơcri di pơgăp 100 tơlăk đong, mờ añ càn bơh mè bèp di pơgăp 70 tơlăk đong, khà priă gam tai bi Hùng ai càn mờ ờ sa priă cồng. di lah ờ tơl priă tai den bi hơ geh tăc ka sơntìl lài mờ lŏ ka sa añ in, añ tơm wơl tơnơ̆ kung di sơl”.

Jăt bi Võ Minh Cường, Phó Củ tịc Mpồl tam klăc ơruh pơnu Việt Nam kơnhoàl Krông Búk yal, ròng ka Koi là dùl broă lơh pa ngan tàm tiah kơh bơnơm dê, mơya neh lơh geh ală cồng nha ngan. Bơta do neh pơgồp bal tàm bơta ai geh bơta pràn nàng nùs nhơm mŭt lơh broă, bơceh lơh bơh uă ơruh pơnu tàm kơnhoàl do in. “Mpồl ơruh pơnu mŭt lơh broă kơnhoàl Krông Búk gam bơ̆t bơtàu uă broă lơh niam, ală hìu ròng ka Koi Dăk Lăk geh bi Phạm Thế Hùng dong kờl. Bơh tŭ hơ̆, pơgồp bal tàm broă bơto broă lơh ờ sa priă mờ pơlam mŭt lơh broă ai ală cau tàm mpồl ndai in. Bơh bơta do, bol añ gơtùi lơh ală mpồl niam dờng rơlao là broă lơh Hợp ták xã mờ gah lơh broă pa, ai geh broă lơh ơruh pơnu tàm do in kung bè geh priă nàng dong kờl hìu nhă ală bơyô in”.

Cau cih Tuấn Long-Cau mblàng Ndong Brawl