VOV4.K’ho- Mho ngai 05/09, tàm Hà Nội, Ƀộ Nông nghiệp mờ Phát triển Nông thôn pơrjum băo ờs mờng qúy 3 yal bè bơta lơh sa, tac phan mờ lơgar ndai phan lơh geh bơh suơn sre mờ lam lơh kơnòl broă ală nhai lồi nam.

Thứ trưởng ồng Phùng Đức Tiến sồr lơh ngan ntoăt jat jơnau kờñ tăc phan mờ lơgar ndai phan lơh geh bơh suơn sre 50 tơmàn dolar Mỹ

8 nhai do, priă lơh geh tăc phan lơh geh bơh suơn sre, phan brê bơnơm, phan tàm dà mờ lơgar ndai kờp dŭ geh 36 tơmàn 300 tơlak dolar Mỹ, gơguh 13,1% pơndrờm dùl tŭ bal mờ nam lài. Jơh gùt gah lơh broă pơn jat tai gàr niam gơguh lơh sa, gàr tơl niam phan ngui, phan sa, pơgồp bơnah gàr niam ală bơta lơh ring bal dờng bơh rài lơh sa dê. Bơdìh mờ tềl tơngŏ chờ hờp bè mpồl lơh geh bơh lơh sa suơn sre tờm tăc mờ lơgar ndai lơh geh mờr 15 tơmàn dolar Mỹ 8 nhai do, gơguh 7,4%, gah lơh sa suơn sre kung geh 7 mpồl phan bơna geh priă jền tăc mờ lơgar ndai rlau 2 tơmàn dolar Mỹ, tàm hơ̆ geh: kơphê, kao su, phe, biăp, plai đo, ka ti, phan lơh bơh dơm chi. Kung tàm dơ̆ pơrjum băo, ală mpồl lơh broă gơwèt Ƀộ Nông nghiệp mờ Phát triển Nông thôn kung lơh loh rlau tai ală broă lơh sơlơ tơnguh ală mpồl gah phan lơh geh bơh suơn sre geh priă jền gơguh; giă xăng zờu gơguh uă gơrềng tus lơh broă tam phan mờ ròng phan tàm dà; ală broă lơh nàng tă bơsong sră rơmĭt bơh Ủy ƀan câu Âu (EC) gơwèt mờ phan tàm dà Việt Nam dê, pơnđơl pràn lơh ngan lơh geh jơnau kờñ tac mờ lơgar ndai geh 50 tơmàn dolar Mỹ.

Cau mblàng K’Hạnh