VOV4.K’ho- Bơh nam 2017 tus nam 2021, mờ bơta lơh ngan bơh jơh gùt anih lơh broă cíñ trị mờ làng bol dê, càr Gia Lai neh lam lơh tam 31 rbô lồ brê, uă ngan tàm bă ù làng bol sơ gràm ù tam sền gàr brê yal is. Bulah bè hơ̆, jat cồng nha jat sền bơh Hội đồng Ñân zân càr Gia Lai dê, tàm 2, 3 kơnhoàl, cồng nha bơh broă tam brê tơngai do lơyah ngan, tài khà chi brê gơtìp chơt uă, geh ală tiah khà tờm chi chơt gơguh tus 90% tơn.

Bă brê bơh hìu bơnhă bi Jiao Klong dê tàm xã Ia Rsai, kơnhoàl Krông Pa gơtìp chơt 9 tờm tàm 10 tờm geh tam, den tàng ờ geh sền sơ wì tơm priă

Nam 2020, hìu bơnhă bi Jiao Klong mờ 300 hìu bơnhă tàm Ia Rsai, kơnhoàl Krông Pa geh hòi jà tam 417 lồ brê keo tàm ù mìr mùl màl ù brê. Tàm tŭ kơp tờm keo dờng, ală hìu bơnhă kung gam tam tai kòi mờ bùm blàng nàng geh tai priă jền. Tơnơ̆ 2 nam, rlau 150 lồ keo neh chơt mờr jơh, git nđờ jơt lồ mìng kis geh hơ đơm 50%. Bè brê mờ hìu bơnhă bi Jiao Klong tam, khà kis ờ hềt tus 10%, den tàng ờ geh sền sơ wì mờ tơm priă tam brê: “Bol hi kung kờñ tam chi mơya ù tàm do ờ gơtùi tam chi, uă ngan là ù ro kơn rañ, tam phan lơi kung ờ gơtùi kis, bal mờ hơ̆ trồ tiah tàm tiah mìu, tơngai nisơna, kàl prang sùm jŏ jòng, ù tiah ờ tơl dà lơh tờm chi ờ gơtùi kis”.

Khà brê tam bơh nam 2017 tus nam 2021 tàm uă tiah tàm Gia Lai kis, dờng dùl êt ngan

Ndrờm bè hơ̆ sơl, cồng nha tam brê tàm ală mpồl atbồ tàm tơngai do tàm Krông Pa kung lơyah ngan sơl. Ồng Vũ Đức Dâm, kwang atbồ Mpồl atbồ brê rơcang gàr bồ tô Ia Rsai, kơnhoàl Krông Pa pà git, tàm 2 nam, 2019 mờ 2020, Mpồl atbồ brê rơcang gàr bồ tô Ia Rsai, kơnhoàl Krông Pa tam 60 lồ keo sơntìl pa, mơya tus tŭ do, mìng mờr 7 lồ geh tờm chi kis. Jat ồng Dân pà git, geh uă jơnau lơh gơbàn broă tam brê tàm ù tam sền gàr brê gơtìp sơ gràm lơh geh cồng nha lơyah. Tàm hơ̆, sền bal là jơh ală tiah tam brê ndrờm ngài lơm, ù tiah brê bơnơm kal ke, tơngai tam chi di tàm tơngai trồ prang duh jŏ jòng. Bal mờ hơ̆ là tài bơh priă tam brê tŭ do lơyah, ờ dipal mờ bơta geh ngan broă lơh sa bơh làng bol tàm ƀòn lơgar dê: “Bè broă lơh dong kờl bơcri priă, dà lơgar ờ hềt gàr niam jat jơnau sồr bơh làng bol dê. Dùl tơngai tam brê, sơngka sền gàr sùm là 4 nam. Priă bơcri gơ wèt mờ 1 lồ tàm 1 tơngai là rlau 35 tơlak. Tàm tŭ hơ̆ dà lơgar mìng dong kờl 2 tơlak 500 rbô đông. Làng bol tàm do uă ngan là cau jơi bơtiàn kòn cau dùl êt nă cau, broă lơh sa gam uă kal ke. Làng bol ờ geh priă tă lơh, sơngka sền gàr. Bơh hơ̆ lơh gơbàn bơta tờm chi chơt hời rơ hời”.

Jat Hội đồng Ñân zân càr Gia Lai yal, bal mờ kơnhoàl Krông Pa, cồng nha jat sền tàm ală kơnhoàl Phú Thiện, Chư Pưh... kung ndrờm bè do sơl. Hội đồng Ñân zân càr Gia Lai dan dà lơgar sền sơ wì, tă bơsong ală bơta ờ niam tàm priă jền dong kờl gơ wèt mờ làng bol, ală mpồl tam brê nàng dong broă tam brê lơh geh cồng nha uă, nàng broă lơh gơ glòm tơlir brê cèng wơl cồng nha ngan ngồn ai làng bol in.

Cau mblàng K’Duẩn