Do là kơnòl broă tờm geh ai tơlik tàm pơrjum Mpồl đơng pơlam gah lơh phan kơphe pah nam nam 2022 bơh Viện Broă lơh mờ Broă rơndap lơh bơtàu tơnguh lơh sa suơn sre ƀòn lơgar pơgồp bal mờ Kụk Tam phan, Ƀộ Nông nghiệp mờ Phát triển Nông thôn bơyai lơh ngai 26/10 tàm càr Dăk Lăk. Tơnơ̆ mờr 10 nam lơh broă, Mpồl đơng pơlam gah lơh phan kơphe Việt Nam neh pơgồp bơnah sơlơ lơh niam wơl suơn kơphe neh kra cồng nha tơnhàu ờ uă bơh rơndap broă lơh tam pa wơl kơphe, lam lơh ngan ngồn lơh sa suơn sre kơ̆ kơljap sùm bơh broă lơh kơphe lơh niam ù tiah, tơnguh bơta kuơ lơh geh kơphe dê bơh rơndap broă lơh kơphe bơkah.

Tam kơphe tơl khà kơphe bơkah

Tàm pơrjum, ală kwang bàng neh tơrgùm cribơyai, tam pà, tă pơgồp ală jơnau bơceh pa tàm bơtàu tơnguh kơphe Việt Nam kơ̆ kơljap sùm tàm tơngai tus. Mpồl đơng pơlam gah lơh phan kơphe Việt Nam neh ring bal broă lơh nam 2023, tơrgùm lam lơh lài tam pa wơl kơphe mờ bơtàu tơnguh kơphe bơkah nàng lơh geh jơnau kờñ tus nam 2025, geh 107 rbô lồ kơphe tam pa wơl mờ 11 rbô 500 lồ kơphe bơkah mờ kơphe lơh geh 5 rbô tấn.