VOV4.K’ho - Pa do, đơs tàm dơ̆ tìp măt, lơh broă mờ 70 nă cau jăk chài; ală giáo sư, bác sĩ; kuang đơng lam, kuang đơng lam lài do ală hìu sơnơm, hìu bơsram đại học, anih kơlôi sơnơng gah lơh sơnơm; ala măt ală mpồl duh broă khoa học mờ anih lơh broă atbồ khoa học gah lơh sơnơm, Thủ tướng Chính phủ ồng Phạm Minh Chính đơs tờm: Broă pơgồp bal kuơ màng ngan bơh gah lơh sơnơm tàm broă sền gàr bơta pràn kơl dang să jan làng bol. Đảng, Dà lơgar bal mờ làng bol git ưn ngài mpồl khoa học gah lơh sơnơm bơh ală rài, tàm hơ̆ uă ngan là tàm kòp Covid-19 gơtờp.

Lài ngan bơh dơ̆ tìp măt, Thủ tướng tơlik nùs nhơm ưn ngài, mờ kơ̆p kờñ geh iăt, dờp ală jơnau đơs di pal. Rơlao mờ tŭ lơi jơh, Thủ tướng kơ̆p kờñ ngan ală cau pơgru, ală cau khoa học geh broă mờng chài tàm broă rơcang sơndră mờ kòp kơlôi sơnơng, lơh ală bơta sơnơm, sơnơm vaccine rơcang sơndră mờ kòp Covid-19, tàm tơngu me hơ̆ he ring bal geh broă lơh di pal nàng kơrian kòp Covid-19. Thủ tướng kơ̆p kờñ ală cau jăk chài ai tơngai uă ngan nàng pơgồp jơnau đơs.

Tàm dơ̆ pơrjum, uă cau jăk chài đơs mờ tơlik jơnau ngoh rơngăc ngan tŭ dờp geh jơnau sền gròi, tam pà bal bơh Đảng, Dà lơgar bal mờ làng bol; tơlik nùs nhơm sùm lơh ngan lơh broă tài gah lơh sơnơm dà lơgar, tàm hơ̆ uă ngan là tàm bơta kòp Covid-19 gơtờp tŭ do, uă cau jăk chài gam geh ală broă lơh pơgồp bal niam tàm broă rơcang sơndră mờ kòp gơtờp. Ală cau jăk chài yal mờ Thủ tướng Chính phủ ală broă lơh ngan, bơceh lơh tàm broă tơnguh uă cồng nha broă xét nghiệm, tam cah is cau F0, F1, sền gàr tiah tơlir mờ sơm kòp ală cau kòp F0 mờ ai geh jơnau đơs, jơnau dan nàng tơnguh uă cồng nha broă tam dră mờ kòp gơtờp. GS.TS ồng Nguyễn Thanh Bình, Chủ tịch Mpồl duh broă hìu bơsram, Hìu bơsram Đại học Dược Hà Nội đơs là pal lơh jăt nền nòn ală broă mờ chính phủ neh geh ai. “Bè broă lơh jŏ jòng mờ he neh ngui bơh jơnau đơng lam bơh Chính phủ, Bộ Y tế bol añ đơs là di ngan, he neh tơrgùm tàm broă rơcang sơndră mờ kòp bal mờ sơm kòp; rơcang sơndră mờ kòp he geh broă tam cah is, 5K, he neh ngui bloh. He geh sơnơm vaccine kung neh lơh jăt; sơm kòp he geh sơnơm”.

Phó GS.TS Lê Văn Truyền, Chủ tịch Mpồl duh broă pơlam ai sră dan tăc sơnơm, phan lơh sơnơm den đơs là, he pal hòi jà mpồl lơh broă bơh ală công ty lơh sơnơm tàm lơgar tơrgùm lơh sơnơm sơm kòp Covid-19. “He pal hòi jà anih lơh sa mờ măi mŏk sơnơm tàm lơgar he geh mờr 300 hìu măi, lơh ngan jòi geh phan lơh nàng lơh sơnơm sơm kòp covid-19 neh geh dunia dờp”.

Đơs pơn dŭt dơ̆ pơrjum, Thủ tướng ồng Phạm Minh Chính đơs tờm 2 tơngu me là broă pơgồp bal bơh ală cau jăk chài gah lơh sơnơm gơwèt mờ broă sền gàr, drơng gàr bơta pràn kơldang să jan làng bol mờ pơgồp bal ai ală broă lơh ngan rơcang sơdră mờ kòp Covid-19 tàm lơgar he. Thủ tướng đơs là broă pơgồp bal dờng màng ngan bơh gah lơh sơnơm gơwèt mờ broă rơcang sơndră mờ kòp Covid-19 tàm lơgar he tàm mờr 2 nam do. Thủ tướng pà git, bơta tờm nàng he chồl kơrian mờ jai pha mờ kòp gơtờp geh tơrgùm gơs 3 bơta tờm: broă lơh ngan bơh jơh ală gah, mpồl lơh broă chính trị; Broă dùl nùs bal bơh làng bol; Ngui ală broă sơm kòp bal mờ sơnơm. Gah lơh sơnơm là bơta tờm kuơ màng tàm broă tam dră mờ kòp bè broă lơh khoa học tam dră mờ kòp, broă pơgồp bal bè broă kơlôi sơnơng, lơh sơnơm vaccine mờ sơnơm sơm kòp bal mờ broă pơgồp bal bè sơm kòp.

Thủ tướng đơs loh, nàng jai pha mờ kòp Covid-19 đơs is mờ kòp gơtờp đơs bal, rơlao tŭ lơi jơh, Chính phủ pal lơh ngan, jơh nùs rơlao tai bơh mpồl ală cau jăk chài, cau khoa học nàng tơnguh bơtàu broă lơh sơnơm he dê là gah lơh sơnơm khoa học, jơi bơtiàn kòn cau, geh uă, tài làng bol drơng lơh; lơh sơnơm rơcang sơndră lài là bơta tờm, lơh sơnơm ƀòn lơgar; pơgồp bal mờ lơh sơnơm yau mờ lơh sơnơm pa, gah lơh sơnơm ling klàng pơgồp bal mờ làng bol lơh sơnơm, lơh sơnơm tàm lơgar pơgồp bal mờ lơh sơnơm bơdìh lơgar. Gơwèt mờ mpồl cau khoa học, Thủ tướng sồr: “Tềng đăp mờ bơta ờ tơl sơnơm vaccine mờ sơnơm sơm kòp covid-19 tŭ do, den sồr ală cau jăk chài, ală cau khoa học ngui jơh ală broă pơgồp bal mờ mpồl ală cau khoa học, ală mpồl lơh broă khoa học tàm dunia nàng jòi geh ală khà sơnơm vaccine, sơnơm sơm kòp covid-19 ai lơgar Việt Nam in mờ bơto sồr broă kham sơm kòp Covid-19 ai làng bol in bơh ală anih yal tơngit”.

Kuơ màng tàm broă lam sồr Thủ tướng sồr tai, ală cau jăk chài, ală cau khoa học pal lơh ngan dong kờl mpồl bơtiàn nàng yal bè broă dong kờl, broă lơh khoa học bè ală broă lơh tàm broă rơcang sơndră mờ kòp gơtờp. “Ală cau jăk chài, ală cau khoa học tơnguh rơlao tai gơnoar bal mờ bơngă pin dờn bơh să tờm dê tàm broă dong kờl mpồl bơtiàn ală jơnau tơngit, jơnau lam sồr nàng geh yal uă, mblàng loh mờ làng bol bè đah khoa học geh ală broă rơcang sơndră mờ kòp gơtờp he dê, bơta do den ờ geh cau lơi đơs jai rơlao mờ ală cau pơgru lơi. Añ kơ̆p kờñ ală cau pơgru lơh bè lơi nàng làng bol in git. Dơ̆ bàr tai là lơh bè lơi nàng làng bol wă, dơ̆ pe là lơh bè lơi nàng làng bol pin dờn. Dơ̆ poan là lơh bè lơi nàng làng bol kờñ mờ dờp bal lơh, dơ̆ pram là làng bol lơh broă bal. Nam lài broă do den ală cau pơgru neh lơh gơs, gam lơh, kơ̆p kờñ ală pơgru lơh uă rơlao, pràn kơl dang rơlao”.

Thủ tướng kơ̆p kờñ tơl nă cau, mpồl cau jăk chài, cau khoa học tàm gah lơh sơnơm tàm lơgar mờ lơgar bơdìh, tơnguh bơhiàn jŏ jòng mờ broă mờng chài, broă jơh nùs, geh kơnòl pơn jăt tai tus bal, dùl nùs bal, mờ ală broă lơh pràn, mùl màl, geh cồng nha, lơh ngan bal mờ gùt lơgar lơh jai pha mờ kòp Covid-19, sền gàr màng kis làng bol, bơta pràn kơl dang să jan làng bol, gờñ ai rài kis rê wơl bè ờs mờ brồ guh, tơnguh bơtàu broă lơh sa mpồl bơtiàn.

Cau mblàng Ndong Brawl