VOV4.K’ho- Ngai òr (16/08), hìu sơnơm tiah Tây Nguyên (càr Dăk Lăk) neh lơh gơs broă tam gơl broă lơh mờ ai ngui khoa Truyền nhiễm bơh hìu sơnơm do dê gơs cờn dŭt ndơl tàm broă jòi nàng gŏ, sơm kòp cau kòp Covid-19.

                             Càr Dăk Lăk ai ngui mờ lơh broă tiah sơm kòp cau kòp Covid-19 jroă

Broă ai tiah sơm kòp do lơh broă, geh dong kờl càr Dăk Lăk rơcang sơndră niam rơlao mờ kòp Covid-19 gam gơtìp kal ke, dong kờl ală càr rềp bal in bơsong ală cau kòp di lah geh. Jăt mờ hơ̆, hìu sơnơm tiah Tây Nguyên ai ngui Khoa Truyền nhiễm mờ Khoa Dinh dưỡng nàng lơh tiah sơm kòp cau kòp Covid-19 jroă tàm Tây Nguyên in. Tiah sơm kòp do geh 200 nơm jơnờng piam kòp, tềng đăp măt ai ngui 20 nơm jơnờng piam kòp. Ală cau kòp Covid-19 geh ai tus tàm tiah sơm kòp mờ gùng lòt is, geh broă lơh ndơ̆p nàng gàr niam ờ do ờ dă ai jơh hìu sơnơm in. Tŭ do, hìu sơnơm neh lơh tơl ală bơta phan, măi mŏk ai 20 nơm jơnờng piam kòp jroă ngan in, tàm hơ̆ geh măi tă nhơm, măi jồr mhàm, ală phan sền gròi bơta pràn cau kòp.

Cau mblàng Ndong Brawl