VOV4.K’ho - Tàm ngai òr (15/10), gùt càr Dăk Lăk neh gŏ tai 68 nă cau gơtìp mờ kòp Covid-19. Tàm hơ̆, pal kah ngan geh 7 nă cau gơtờp tàm mpồl bơtiàn tàm ƀòn dờng Buôn Ma Thuột. Tàm 7 nă cau do geh 4 nă cau tàm hìu nhă bal tàm sơnah ƀòn Ea Tam, 2 nă cau tàm sơnah ƀòn Tân Thành mờ 1 nă cau tàm sơnah ƀòn Thành Nhất.

         Wàng se, kơrian ală tiah mờ cau kòp ơm kis mờ lơh broă nàng rơcang sơndră mờ kòp gơtờp

Tŭ geh gŏ ală cau gơtìp kòp, gah lơh sơnơm ƀòn dờng Buôn Ma Thuột neh pơgồp bal mờ mpồl lơh broă geh gơnoar lùp sền cah neh tìp rềp mờ bơyai lơh wàng se ală tiah cau kòp ơm kis mờ ală tiah cau kòp neh lòt tus. Mờ lơh xét nghiệm mhar ai ală cau gơrềng bal in. geh rơlao 200 nă cau neh ai mẫu xét nghiệm ndrờm geh cồng nha ờ gŏ mờ kòp.

          Cau mblàng Ndong Brawl