Tŭ do jơh gùt lơgar geh geh mờr 25 tơlak nă kơnòm dềt. Jơh ală kơnòm dềt hơđơm 6 sơnam mờ kơnòm dềt dờp bơta dong kờl mpồl bơtiàn pah nhai geh dà lơgar tă priă blơi sră kham sơm kòp ờ sa priă; broă lơh cĭt vaccine rề ơnàng dà lơgar neh geh tơl jơh ală bơta vaccine kờñ pal geh, khà cĭt vaccine wil tơl ai kơnòm dềt hơđơm 1 sơnam in geh 97%; kơnòm dềt 5 sơnam geh lòt bơsram mẫu giáo.

Dà lơgar ờ sa priă bơsram gơ wèt mờ kơnòm dềt mầm non, kơnòm bơsram bal, cau bơsram jơnau bơto bơtê pe kâp tàm anih bơto bơtê dà lơgar dê lơh mờ dong kờl priă bơsram gơ wèt mờ kơnòm dềt mầm non, kơnòm bơsram bal, cau bơsram broă lơh bơto bơtê pe kâp tàm anih bơto bơtê làng bol dê lơh, lơh is. Kơnòm dềt geh rài kis is ồn geh dờp bơta dong kờl dipal mờ jơnau kờñ mờ bơta bơtàu tơngguh lơh sa – mpồl bơtiàn ƀòn lơgar dê. Ală drơng broă sa priă sền gàr kơnòm dềt 3 khà geh: rơcăng kơryan lài, dong kờl, tus bal neh mờ gam geh lam lơh geh cồng nha. Tàm pơrjum, ală càr, ƀòn dờng kung neh geh jơnau cih cribơyai bè ală cồng nha tàm lơh jăt lơh broă kơnòm dềt tàm ƀòn lơgar; kung bè geh jơnau dan nàng lơh broă sền gàr, drơng gàr kòn dềt geh tơl làm rlau. Đơs pơndŭt Pơrjum, mò Phạm Thị Thanh Trà, Phó Thủ tướng neh song dơ pă ai tơnggĭt ală jơnau gam gơkòl, bè: jơnau tam lơh mờ sơgràm aniai kơnòm dềt kung gam kơn jơ̆ ngan; cau lơh tìs sơmờm anih internet nàng pơndòc, pơn jồ kơnòm dềt ngai sơlơ rơlăc rơliang ngan…Phó Thủ tướng sồr pơn jăt tai lơh sir kơrnoăt boh lam gùng dà broă lơh nàng kờñ geh wơl tơl di tŭ bè gơnoar kơnòm dềt, rơcăng lài rơcăng kơryan tơrmù ƀà uă ngan rlau jơh ală rềs àr gơ aniai gơrềng tus kơnòm dềt.