Mờr dùl poh do, git nđờ jơ̆t nă kwang bàng, cau ling bal mờ mpồl cau lơh broă tờm neh tus bơh trồ rơ̆p àng drim tàm Ƀlàng tơ̆p ƀồc Cau ling chơ̆t màng Mỹ Thắng. Tơl nă cau dùl kơnòl broă lơh: mpồl sền gàr lơngăp lơngai, mpồl cau rồ ƀồc, mpồl lơh sơnơm, mpồl dong broă… Jơh ală ndrờm wèt tus jơnau kờñ bal là lơh gơs broă ai ntìng ƀồc di mờ jơnau sồr, di mờ tơngai geh ai. Trung tá Phạm Hữu Lộc, Chính trị viên phó Mpồl đơng lam Ling klàng sàh Phù Mỹ Đông pà git, tơnơ̆ mờ tŭ rồ geh, ƀồc ntìng geh Mpồl K52 cèng jun tus mpồl lơh sơnơm nàng sền, prăp gàr nền nòn lài mờ tŭ jào tus Mpồl Đơng lam Ling klàng sàh in. “Gơwèt mờ Broă lơh 500 ngai mang, mpồl ling neh sơn đờm lơh bơh ngai 25 nhai 6 tus tŭ do. Mpồl lơh lơh ngan tàm tơngu me ală mpồl neh geh Đảng ủy, Anih duh broă Làng bol sàh lơh gơs, lơh broă pah ngai nàng lơh bè lơi di mờ tơngai geh ai”.

Tàm ală bơtô ƀồc geh rồ, dùl pang toal tang geh tìm nàng tơrmù bơta duh bơh măt tơngai sòl tàm kàl duh dê. Mờ broă lơh mờng chài uă nam lơh kơnòl broă jòi rồ, tơrgùm ƀồc ntìng cau ling chơ̆t màng, tơl broă lơh bơh kwang bàng, sìh quan mpồl K52 dê ndrờm nền nòn ngan. Thiếu tá Trần Hoàng Nam, cau tàm Mpồl K52, Mpồl Đơng lam Ling klàng càr Gia Lai pà git, tơl ƀlàng tơ̆p ƀồc geh tơl bơta ù krơi is, den tàng broă tờ rồ sùm geh bơta kal ke krơi is: “Bơh broă lơh jăt kơnòl broă pà gŏ, ală ƀlàng tơ̆p ƀồc tàm ală tiah geh bơta krơi is. Geh ờ uă ƀlàng tơ̆p ƀồc ù mƀờc, kal ke tàm broă tơrgùm, bè tàm Phù Mỹ Đông là ù bràs, den tàng oh mi lơh broă gơtìp tơrlah. Geh ờ uă ƀlàng tơ̆p ƀồc ndai, tŭ tờ den geh dà kung lơh gơrềng uă ngan tus mờ broă rồ tơrgùm ƀồc”.

Broă lơh geh lơh sùm tàm tiah trồ tơngai duh. Cau do glar den geh cau ndai ala. Dà kơl hề gơlik sùh jơh ào mơya kung ờ geh cau lơi lơh broă kờñ jal mhar. Mờ ƀai dềt, rơlĕ chŏ tơl tăp ù lơhơ, tơl nsàng phan, ntìng ƀồc cau ling chơ̆t màng ndrờm geh lơh nền nòn ngan. Sơlơ kal ke, ală cau tàm mpồl K52 càr Gia Lai sơlơ pal lơh nền nòn ngan rơlao. “Kung geh ală bơto ƀồc tàm neh jŏ, ală ntìng ƀồc neh gơtìp ồm, lề uă ngan. Mờ ală ƀồc bè hơ̆, Mpồl K52 bơyai lơh rề ơnàng tiah jòi rồ. Di gơlan tàm broă rơndăp ù tiah jòi, ha là tài tơngai lời wơl den tàng ƀồc gơtìp sơleh. Oh mi lơh ngan rề ơnàng, đal git nền nòn, bañ lời gơtìp gơlời”.

Ngài mờ tiah rồ ƀồc ntìng 20, 30 thơ̆k là anih ală cau chài lơh jăt broă ai ntìng sền nàng git ADN jăt mờ broă lơh nền nòn ngan. Tơl ntìng ƀồc ndrờm geh cih jơnau tơngit, kŭp rùp, cih màh sồ, lir mờ prăp tơl nàng drơng tàm broă đal git tơnơ̆ do. Ƀák sìh Dương Công Hoàng, lam bồ mpồl ai ntìng ƀồc pà git: “Tơnơ̆ tŭ ai ntìng gơs, bơnah ƀồc ntìng gam tai rơ̆p jào ai mpồl tơmŭt tàm măi mok pa jơh nàng cèng rê wơl tàm bơto ƀồc. Gam mpồl lơh broă geh prăp gàr ntìng ƀồc di jăt mờ jơnau geh ai nàng tơnơ̆ do jào ai mpồl dờp in, cèng nàng đal git ală wa in”.

Ƀlàng tơ̆p ƀồc Cau ling chơ̆t màng Mỹ Thắng tŭ do geh 445 bơto ƀồc cau ling chơ̆t màng, tàm hơ̆ gam 118 bơto ƀồc ờ hềt git đal. Broă ai ntìng ƀồc nàng sền ADN tàm do mìng rơ̆p là dùl tàm ală bơta sơn đờm lài ngan bơh Broă lơh 500 ngai mang mờ càr Gia Lai gam lơh tàm uă ƀlàng tơ̆p ƀồc cau ling chơ̆t màng càr dê. Gơl gùng tềng đăp măt kung gam uă kal ke, tài tiah tềl tam lơh neh rŭc ngài. Mơya tơl ƀồc ntìng geh prăp gàr nền nòn tŭ do ndrờm geh cèng bal jơnau kơ̆p gơn bè dùl ngai ală cau ling rài yau rơ̆p geh hòi di măt sơnđan bơh să tờm dê mờ geh rê mờ hìu nhă tờm.