Tàm 6 nhai bồ nam do, ală kâp, gah mờ ƀòn lơgar neh hòi tơrgùm ndrờm bal bơta pràn, lam lơh uă gùng dà broă rơndăp lơh nàng kờñ lơh jăt geh cồng nha Broă lơh dờng. Jơh gùt càr neh dờp mờ lùp nền wơl 500 jơnau yal bè cau ling chơ̆t màng, bơtô ƀồc cau ling chơ̆t màng. Is tàm kơnhoàl ù tiah gùng Trường Chinh, gơ wèt sơnah ƀòn Đăk Cấm mờ Kon Tum, mpồl lơh broă geh gơnoar neh lùp sền, tŭ do gam rờ mờ neh tơrgùm geh 3 ƀồc ntìng cau ling chơ̆t màng.

Càr pơn jăt tai lơh sir sră wăc rùp lòt jòi, sơlơ lùp nền wơl jơnau yal, tơrgùm lùp sền, rờ tàm ală kơnhoàl ù tiah tờm kwơmàng, pơgồp bơnah gờñ gĭt nền geh muh măt ală ƀồc ntìng cau ling chơ̆t màng gam ờ hềt tơl jơnau yal. Quảng Ngãi pơnđơl lơh sir jơh broă lơh ai mẫu tàm nhai 10 nam 2026 do.

Càr Dăk Lăk ai jơnau kờñ lơh sir broă ai mẫu sinh phẩm sền gĭt ADN gơwèt mờ ală ƀồc ntìng cau ling chơ̆t màng ờ hềt sền gĭt geh muh mat lài mờ ngai 31/10 tus. Gùt càr tŭ do geh 34 ƀlàng tơ̆p ƀồc cau ling chơ̆t màng mờ 15 rơbô 222 bơtô ƀồc, tàm hơ̆ 4 rơbô 124 bơtô ƀồc ờ hềt gĭt geh jơnau yal tơngĭt mờ 1 rơbô 784 bơtô ƀồc mìng geh dùl bơnah jơnau yal tơngĭt.

Tus tŭ do, mpồl lơh broă geh gơnoar neh lam lơh ai mẫu tàm 5 ƀlàng tơ̆p ƀồc cau ling chơ̆t màng, ai geh 105 mẫu sinh phẩm tơl ală bơta nàng drơng broă sền gĭt ADN. Gơwèt mờ broă lơh lòt jòi, tơrgùm wơl ƀồc ntìng cau ling chơ̆t màng, kàl prang pa do, Mpồl K51 Gah đơng lam Ling klàng càr Dăk Lăk neh tơrgùm geh 27 ƀồc ntìng cau ling chơ̆t màng tàm lơgar Campuchia. Tơnơ̆ tŭ jun rê wơl tàm lơgar, mpồl lơh broă pơn jat tai bơsong 12 jơnau yal mờ tơrgùm geh tai 4 ƀồc ntìng cau ling chơ̆t màng tàm ală sàh Krông Bông mờ Tây Sơn.