“Tàm rài kis pah ngai, rơnàng kơnòm să mìng ngui dà yoan nàng đơs, tàm hơ̆ uă ngan là tàm ală oh kòn kòn sao gam dềt, uă tŭ đơs bơrlŭ bal đah dà đơs kòn cau K’ Ho mờ dà Yoan. Geh tùp mờ ală cau đơs jơnau đơs kòn cau K’ Ho bơh Anih jơnau đơs Việt Nam, añ ngoh rơngăc ngar tŭ git ală oh mi kung gam pơgồp bal tàm broă prăp gàr, jơnau đơs, akhar cih kòn cau K’ Ho he dê”.

Hơ̆ là jơnau đơs bơh ồng Liêng Hót Ha Chong tàm sàh Dam Rong 4, càr Lâm Đồng dê tŭ tìp mờ ală cau sền sơwì jơnau đơs tàm dùl dơ̆ tus jòi kŭp săp jơnau đơs pơn đik kòn cau K’ Ho he dê. Bơta lơh ồng ngoh rơngăc ngan ờ mìng là geh boh bơr mờ dà đơs mè deh, mờ gam gŏ dà đơs kòn cau K’ Ho dê kung gam prăp gàr, lơh geh uă cau git bơh tàm jơnau đơs dà lơgar dê.

Bal mờ broă yal tơngit gùng dà broă lơh bơh Đảng, adăt boh lam bơh Dà lơgar dê tus mờ làng bol, Jơnau đơs dà kòn cau K’ Ho bơh Anih jơnau đơs Việt Nam gam là anih yal bè ală cau niam, broă niam, jơnau đơs pơn đik, jơnau yal yau mờ ală bơta kwơ niam chài ờs mờng, pơgồp bal tàm broă lơh geh nùs nhơm pơnyờ să jơi bơtiàn mờ jơnau git wă prăp gàr bơta niam chài kòn cau K’ Ho dê. Tàm hơ̆ uă ngan, geh cau pơgru kơnòm să iăt, sền jơnau đơs do là jơnau tờm geh kwơ tàm broă bơto dà đơs kòn cau K’ Ho dê. Pơgru K’ Trỗi, bơto tàm hìu bơsram kấp 1 mờ Kấp 2 Gia Bắc, càr Lâm Đồng pà git: “Tŭ do añ gam bơto dà đơs kòn cau K’ Ho nàng ală cau pơgru bal mờ ală kơnòm bơsram in. Bơh jơnau đơs, añ geh bơsram tai uă jơnau mờng chài tàm broă mblàng jơnau, sền sơwì jơnau nàng bơtơl jơnau git wă ai broă lơh añ dê. Tài gàr niam dà đơs kung là gàr geh bơta niam chài ờs mờng kòn cau he dê”.

Ală jơnau pà git hơ̆ là cơng tàng pà gŏ bơta Kwơ màng bơh Jơnau đơs kòn cau K’ Ho bơh Anih jơnau đơs Việt Nam dê tàm rài kis. Dùl bơnah poa rài neh rơlao, Jơnau đơs dà kòn cau K’ Ho bơh Anih jơnau đơs Việt Nam neh ai tơngŏ gơnoar là anih mblàng jơnau tờm mờ dà đơs mè deh, dong kờl làng bol ƀuơn tìp mờ gùng dà broă lơh bơh Đảng, adăt boh lam bơh Dà lơgar dê; mblàng yal bè broă sền gàr bơta pràn kơl dang să jan, ring bal cau klao mờ cau ùr, sơrbì bơhiàn ờ niam, bañ bao gờñ, bao rềp jơi nòi bal, bơtàu tơnguh lơh sa, tơrmù rơƀah mờ bơ̆t bơtàu ƀòn lơgar pa.

Mò Cil Bri, Phó Kwang Lam bồ Sờh Jơi bơtiàn mờ Pin dờn Jăt yàng càr Lâm Đồng đơs là, do kung là anih pơgồp bal tàm broă prăp gàr jơnau đơs, akhar cih, prăp gàr bơta niam chài kòn cau K’ Ho dê mờ tam dră mờ ală jơnau tơngit tìs, ờ di. “Bơh ală jơnau đơs jơnau mblàng yal tơngit mờ dà đơs kòn cau K’ Ho dê, làng bol geh git di tŭ jơnau yal tơngit tờm, tơnguh jơnau rơcang ngăc lài tềng đăp mờ ală jơnau đơs pơrlồm ờ di pal, pơgồp bal tàm broă tơnguh mpồl tam klăc gùt jơi bơtiàn mờ tơnguh uă cồng nha mblàng jơnau gùng dà broă lơh bơh Đảng, adăt boh lam bơh Dà lơgar dê”.

Mŭt tàm rài măi mok pa, Jơnau đơs dà kòn cau K’ Ho ờ mìng geh pờ tơlik tàm Rơjô mờ gam rề ơnàng pràn kơl dang pờ tơlik tàm internet. Bal mờ broă tơmŭt jơnau tơngit tàm pang website dà kòn cau K’ Ho (vov4.vov.vn/Kho), Jơnau đơs dà kòn cau K’ Ho bơh Anih jơnau đơs Việt Nam gam geh Fanpage “Tiếng K’Ho VOV Tây Nguyên”. Tus tŭ do, Fanpage do neh geh mờr 9 rơbô dơ̆ cau sền bal mờ git nđờ rơbô dơ̆ tam pà, pơgồp jơnau đơs. Ală jơnau yal tơngit, jơnau đơs, jơnau đơs pơn đik, jơnau yal yau mờ dà đơs kòn cau K’ Ho geh pờ tơlik uă, ai dà đơs bơh kòn cau K' Ho dê lik bơdìh mờ broă mìng geh pờ tàm Rơjô bè ờs tus mờ kòn cau K'’Ho dê tàm uă tiah, bal mờ cau K' Ho kis hờ lơgar bơdìh.

Bơyô Ka Hưng, Atbồ Ƀòn Niam chài kòn cau K'Ho, sùm tam pà bal ală jơnau đơs tàm pang internet mpồl bơtiàn mờ kơ̆p kờñ geh uă cau git tus mờ gơboh kờñ dà đơs mè deh dê rơlao. “Dan jà ală cau tus bal sền mờ gơboh kờñ pang dà đơs kòn cau K’Ho VOV Tây Nguyên dê. Mìng geh dùl broă lơh dềt, mơya bơta kwơ geh uă ngan. Do rơ̆p là anih nàng he tàm tơrbŏ bal, prăp gàr bal dà đơs kòn cau K’ Ho he dê. Prăp gàr dà đơs kòn cau K’Ho kung là prăp gàr rài lài do bal mờ bơta niam chài krơi is kòn cau K’ Ho dê”.

25 nam do, bơh tàm ală tŭ pờ tơlik jơnau đơs sơnrờp ngan tus mờ broă pờ tơlik jơnau đơs tàm măt mok sồ tŭ do, Jơnau đơs dà kòn cau K’ Ho bơh Anih jơnau đơs Việt Nam kung gam sùm là anih tơrbŏ ƀòn lơgar, pơgồp bal tàm broă prăp gàr jơnau đơs, akhar cih bal mờ bơta niam chài mờ lơh geh uă ală bơta kwơ niam bơnĕ bơh jơi bơtiàn dê. Bal mờ ală jơnau đơs dà kòn cau Rơđê, Jrai, Bơnhàr, Sơdàng mờ Mnông bơh Anih jơnau đơs Việt Nam dê. Jơnau đơs dà kòn cau K’ Ho gam pơn jăt tai tam gơl pa tơngu me jơnau đơs, broă lơh, lơh pràn broă tam gơl sồ nàng jơnau đơs bơh VOV sùm đềt mềr, mùl màl, lơh broă bal mờ làng bol ală jơi bơtiàn tiah Tây Nguyên tàm gùng bơtàu tơnguh pa.