VOV4.K’ho - Jơnau yal bơh Mpồl đơng lam rơcang sơndră mờ kòp Covid-19 càr Dăk Lăk dê, tàm ngai òr (01/11), càr do neh gŏ geh khà cau gơtìp kòp Covid-19 uă ngan bơh lài tus tŭ do, mờ 244 nă tàm 12 kơnhoàl, thị xã, ƀòn dờng, tàm hơ̆ geh 67 nă cau geh gŏ tàm mpồl bơtiàn.

                                                               Dùl ƀòn gơtìp wàng se kơrian

Ƀòn dờng Buôn Ma Thuột geh 72 nă cau gơtìp kòp pa, tàm hơ̆ geh 32 nă cau tàm mpồl bơtiàn. Thị xã Buôn Hồ, kơnhoàl Krông Búk mờ kơnhoàl Krông Ana kung là 3 tiah geh khà cau gơtìp uă ngan. Kờp tus mang ngai 01 nhai 11, càr Dăk Lăk neh gŏ 4 rơbô 294 nă cau gơtìp mờ kòp Covid-19, tàm hơ̆ geh 2 rơbô 160 nă cau neh sơm bời kòp. Mìng is tàm 10 ngai pa do, gùt càr neh dờp geh 1 rơbô 366 nă cau gơtìp kòp Covid-19, tàm hơ̆ neh geh 704 nă cau gơtờp tàm mpồl bơtiàn.

Cau mblàng Ndong Brawl