VOV4.K’ho - Jăt khà kờp bơh Sở Y tế càr Dăk Lăk yal, tàm khà 325 nă cau kòp Covid-19 neh bời rê bơh hìu sơnơm tàm tơngai pa do, geh gŏ 20 nă cau gơtìp gŏ wơl mờ kòp. 20 nă cau gơtìp wơl mờ virus Sars CoV-2 geh gŏ tàm ƀòn dờng Buôn Ma Thuột mờ 5 kơnhoàl là Buôn Đôn, Ea H’leo, Krông Bông, Cư Kuiñ mờ Ea Kar.

Tàm hơ̆, kơnhoàl Cư̆ Kuiñ geh khà cau gŏ wơl mờ kòp uă ngan mờ 5 nă. Pal kah ngan, tàm khà do geh 1 nă cau kis tàm xã Ea Wer, kơnhoàl Buôn Đôn geh sền gơtìp wơl lơh mờ lơh gơtờp dùl nă cau tàm hìu nhă. Bác sĩ Châu Đương, Kuang atbồ Hìu sơnơm bơsiă jòr mờ kòp klờm soh càr Dăk Lăk pà git, jăt jơnau bơto sồr bơh Bộ Y tế, ală cau do di lah xét nghiệm wơl mờ cau kòp geh gŏ mờ virus gam uă, di gơlan lơh gơtờp tus mờ mpồl bơtiàn, geh cèng tus tàm hìu sơnơm nàng pơn jăt tai sơm kòp mờ tam cah is di jăt mờ kơrnoăt geh ai.

Cau mblàng Ndong Brawl