VOV4.K’ho- Tơngai rềp ndo geh git nđờ jơt rbô nă cau bơh ală càr tiah đah jum dà lơgar rê hờ càr Dăk Lăk. Ală mpồl lơh broă kòp Covid-19 mpồl bơtiàn neh tơnguh cồng nha lơh broă, mblàng yal mờ gròi sền làng bol lơh jat niam broă rơcang sơndră kòp bơh tơl hìu bơnhă.

Ƀòn Hluk, xã Ea Tiêu, kơnhoàl Cư Kuiñ, càr Dăk Lăk geh mờr 20 nă cau bơh ală càr tiah đah jum dà lơgar rê wơl, pal tam cah is tàm hìu. Ồng Y Nguă Byă, atbồ mpồl lơh broă kòp Covid-19 mpồl bơtiàn ƀòn Hluk pà git, mpồl ờ mìng lòt sền, gròi sền cau tam cah is tàm hìu halà tàm hìu kù tàm mìr mờ gam sùm tơngkah tơl nă cau tàm ƀòn ờ huan lòt rê, ơm rềp cau ndai, lơh jat nền nòn jơnau sồr 5K. Ồng Y Nguă geh kòn ùr mờ kòn bơr tơu pa bơh tiah geh kòp rê wơl kung lơh bè hơ̆ sơl: “Kòn ùr mờ kòn bơr tơu lòt lơh broă tàm càr Bình Dương rê den geh kơrnuat bơh Ủy ban Nhân dân xã dê ai tam cah is 14 ngai tàm hìu, ngan là ờ geh lik hờ bơdìh, ờ geh boh bơr, ơm rềp cau tàm ƀòn. Bàr nă ùr bơklau pal ơm hìu is, tam cah is mìng geh 2 nă ùr bơklau lơm gơ dê. Ai phe, dà hùc, phan sa kờñ den hòi điện thoại hơ̆ sồng he cèng tus kòn in, kung ờ geh ơm rềp sơl”.

Mpồl lơh broă kòp Covid-19 mpồl bơtiàn ƀòn Hluk

Ƀòn Hluk geh mờr 150 hìu bơnhă làng bol mơya geh tus 5 mpồl lơh broă kòp Covid-19 mpồl bơtiàn. Ală jơnau tơnggit bè broă gơlik geh bơh kòp bơtờp dê sùm geh yal, mờ bơta mblàng yal sùm bơh ală mpồl lơh broă dê, làng bol tàm ƀòn neh git lơh jat jơnau sồr 5K rơcang sơndră kòp. Pơn yơu bè broă ies tơp ƀồc, làng bol lơh bal hiă lơm, ờ huan ai uă cau tus ies còp. Ồng Y Sách Bkrông, atbồ ƀòn Hluk pà git: “Chơt ngai do den ngai hìng tơp tơn. Làng bol lòt ies, còp den rê tơn, ờ ai ơm wơl jŏ. Tam gơl uă ngan, mhar ngan, ờ roh priă jền, ờ lời uă ngai, uă jơ. Tài rơcang sơndră kòp mờ bơta lơi kal ke den he sang tĕ. Tŭ do, dilah jŏ jòng bơh 3 tus 4 ngai, sơlơ jŏ ngai den priă jền sơlơ uă. Dơ̆ 2 tai là khi kung git gơl, den bơta do hìu bơnhă geh kàr lơi den lơh kàr hơ̆, oh mi jơi nòi rềp ngan rlau jơh hơ̆ sồng ơm wơl, ờ gam tơrgùm gal cau bè lài tai”.

Kơnhoàl Cư Kuiñ là tiah sơn rờp bơh cả Dăk Lăk dê geh kòp Covid-19 tàm ală ƀòn làng bol jơi bơtiàn kòn cau dùl êt nă cau. Kơnhoàl neh lơh geh cồng nha tàm broă kơryan kòp bơtờp, rê wơl bơta bè ờs pa bơh lồi nhai 8. Nàng làng bol sùm git wă lơh jat nền nòn broă lơh rơcang sơndră kòp, ală mpồl lơh broă kòp Covid-19 mpồl bơtiàn là ală cau ơm rềp, pah ngai mblàng yal tơn, gròi sền mờ tơngkah tơn. Tơl mpồl bè hơ̆ geh bơh 4 tus 5 nă cau, geh cau geh bơngă pin dờn tàm ƀòn lơgar, đảng viên, kuang bàng ală mpồl cau, gơnoar atbồ xã. Ồng Y Min Êñuôl, Bí thư Đảng ủy xã Ea Tiêu, kơnhoàl Cư Kuiñ đơs: “Tam pà kơnòl broă tơl nă cau drơng dùl tiah, dùl thôn, ƀòn. Cồng nha mpồl lơh broă mpồl bơtiàn pal yal mờ Ủy ban Nhân dân xã, thường trực Đảng uỷ, mpồl, thôn, ƀòn lơi ờ lơh jat nền nòn den pal yal di tŭ nàng geh broă lơh bơsong, cribơyai. Mpồl lơh broă mpồl bơtiàn den oh mi lòt lơh broă ờ git là trồ tơngai, trồ mìu, trồ mang, den tàng pa do mpồl lơh broă òp Covid-19 mpồl bơtiàn lơh niam ngan”.

Bơt bơtàu mpồl rơcang sơndră kòp bơh tàm tơl ƀòn

Ồng Lê Thái Dũng, Bí thư Huyện ủy Cư Kuiñ pà git, mìng tàm 1 poh, kơnhoàl neh geh rlau 1 rbô nă làng bol rê bơh ală càr tiah đah jum dà lơgar. Tàm tŭ tơngai kòp bơtờp gơlik geh kal ke, pal lơh niam rlau tai, kơnhoàl neh crơng gơs tus 547 mpồl lơh broă kòp Covid-19 mpồl bơtiàn. Tŭ do, ală mpồl lơh broă kòp Covid-19 mpồl bơtiàn gam lơh broă geh cồng nha nàng gròi sền, tam cah is cau rê wơl hờ kơnhoàl: “Crơng gơs 547 mpồl lơh broă kòp Covid-19 mpồl bơtiàn gùt kơnhoàl nàng tam pà dềt, tàm dùl mpồl lơh broă kòp Covid-19 den mìng gròi sền bơh 20 tus 30 hìu bơnhă, den broă gròi sền, sền sơ wì, ngan là cau lơh broă bơh ală càr tiah đah jum dà lơgar, tiah geh kòp rê pal ngui mpồl lơh broă do, ngan là tàm ală ƀòn. Cư Kuiñ kờp dŭ “tam lơh mờ bol sò tơm mờ broă lơh tam cah dềt”, he tam cah gơs mpồl dềt, bơh thôn, ƀòn hơ̆ sồngt us xã, dilah kal ke ir den hơ̆ sồng tus kơnhoàl”.

Broă bơt bơtàu mpồl rơcang sơndră kòp bơh tàm tơl ƀòn bal mờ ală broă lơh kràñ cê, jơh nùs neh pơgồp bơnah dong kờl Cư Kuiñ neh dùl nhai mờ nggùl ờ hềt geh cau bơtờp kòp Covid-19 tàm mpồl bơtiàn.

Cau mblàng K’Duẩn