VOV4.K’ho- Tàm 2 ngai, ngai 4 mờ ngai 5/10, ƀòn dờng Buôn Ma Thuột, càr Dăk Lăk sùm sền gŏ 9 nă cau kòp Covid-19 ờ hềt gĭt bơtờp bơh tiah lơi tàm mpồl bơtiàn. Tàm khà 9 nă cau geh cồng nha xét nghiệm mhar bơtờp mờ virus Sars CoV-2, geh 3 nă cau sền gŏ tàm sơnah ƀòn Tân An, khà cau gam wơl geh gơrềng tus cau kòp tàm xã Hòa Thuận. Pal sền gròi ngan là 3 nă cau tàm dùl hìu bơnhă ơm tàm thôn 4, xã Hòa Thuận, pah ngai ơm rềp mờ uă cau mờ lòt tus uă tiah.

Bơh ală cau kòp do, mpồl lơh broă geh gơnoar neh sền gŏ tai 3 nă cau F1 test mhar cồng nha là bơtờp kòp. Geh gơrềng tus tiah kòp tàm xã Ea Kao geh sền gŏ ngai 28/9 pa do, mpồl lơh broă geh gơnoar neh ai mẫu test mhar kháng nguyên dơ̆ 3 ai làng bol tàm ƀòn Tơng Jú mờ sền gŏ tai 22 nă cau bơtờp mờ virus Sars CoV-2.

Cau mblàng K’Hạnh