VOV4.K’ho- Ngai 16/11, ƀác sĩ Trần Thuận- Kuang ătbồ Hìu sơnơm kơnhoàl Krông Búc, càr Dăk Lăk pà gĭt, tàm ù tiah kơnhoàl dê pa gŏ 6 nă kuang bàng gam lơh broă tàm Ủy ban Nhân dân kơnhoàl Krông Buk geh cồng nha test mhar kháng nguyên bơtờp mờ virus Sars CoV-2, tàm hơ̆ geh 5 nă cau gam lơh broă tàm Phòng Tài nguyên mờ Môi trường kơnhoàl Krông Buk bơtờp mờ virus Sars CoV-2.

Tiah sơm cau kòp Covid-19 tàm kơnhoàl Krông Buk

Tơnơ̆ tŭ dờp geh jơnau yal do, Hìu sơnơm kơnhoàl Krông Buk neh lòt jòi cau ơm rềp, ai mẫu xét nghiệm ai ală cau geh gơrềng in. Nàng sền gàr niam broă lơh rơcăng sơndră kòp, mpồl lơh broă geh gơnoar neh wàng se ing dùl hìu lơh broă tàm anih lơh broă bơh Ủy ƀan Nhân dân kơnhoàl Krông Buk dê gơrềng tus ală cau bơtờp mờ virus Sars CoV-2. Ală cau F1 geh ai ơm yah ngài jăt jơnau sồr. Kờp tus klo ngai 16/11, jơh gùt càr Dăk Lăk gŏ 6 rbô 154 nă cau kòp Covid-19, tàm hơ̆ geh 3 rbô 493 nă cau neh sơm bời mờ rê bơh hìu sơnơm.

Cau mblàng Lơ Mu K’Yến