VOV4.K’ho- Jat Mpồl đơng lam rcang sơndră kòp Covid-19 càr Dăk Lăk dê yal, tàm ngai 04/8, gùt càr sền gŏ tai 24 nă cau pin bơtờp mờ virus Sars CoV-2 tàm 9 kơnhoàl, thị xã mờ ƀòn dờng. Ea Kar là tiah sền gŏ cau kòp uă ngan rlau jơh mờ 6 nă cau; pơn jat tai là 2 kơnhoàl Cư M’gar mờ Krông Pách, tơl tiah geh 05 nă cau kòp; thị xã Buôn Hồ mờ kơnhoàl Buôn Đôn tơl tiah geh 2 nă cau kòp; ală kơnhoàl: Ea H’leo, Ea Súp, Krông Năng mờ Cư Kuiñ tơl kơnhoàl geh 1 nă cau kòp. Ală cau do ndrờm sền gŏ tàm mpồl bơtiàn mờ geh bơta lòt rê geh gơrềng tus bòn dờng Hồ Chí Minh, càr Đồng Nai mờ càr Bình Dương. Gah lơh sơnơm càr Dăk Lăk neh lơh broă lơh jòi gĭt tiah lòt rê geh rlau 100 nă cau F1 geh gơrềng tus ală cau kòp do nàng ai mẫu xét nghiệm mờ jun ai ơm ơm yah ngài tơrgùm bal.

Cau mblàng K’Hạnh

Kuang bàng lơh sơnơm lòt jòi gĭt tiah lòt rê ală cau geh gơrềng tus cau kòp tàm mpồl bơtiàn tàm Dăk Lăk

Kờp tus 5 jiơ mho ngai 04/8, càr Dăk Lăk neh geh 307 nă cau bơtờp mờ virus Sars CoV-2, tàm hơ̆ gam sơm kòp ai 300 nă cau, 07 nă cau neh bời kòp mờ ờ geh cau chơ̆t.

Cau mblàng K’Hạnh