VOV4.K’ho - Jơnau yal bơh Mpồl đơng lam sơndră mờ kòp Covid-19 càr Dak Lak, tàm ngai òr (02/08), gùt càr neh dờp geh tai 25 nă cau gơtờp mờ virus Sars CoV-2. 18 tàm 25 nă cau gơtìp mờ kòp Covid-19 tàm càr Dak Lak geh gŏ tàm ngai geh bơta kòp gơrềng tus ƀòn dờng Hồ Chí Minh mờ càr Bình Dương.

Broă lòt sền, gròi sền ală cau tam cah is tàm hìu geh ală mpồl lơh broă geh gơnoar lơh sùm tàm càr Dak Lak

6 nă cau geh gŏ tàm ală tiah tam cah is. Do là ală cau F1 bơh ală cau kòp neh geh gŏ lài mờ hơ̆ tàm kơnhoàl Buôn Đôn, thị xã Buôn Hồ mờ ƀòn dờng Buôn Ma Thuột. Kung tàm ngai bal, càr Dak Lak gŏ 1 nă cau kòp tàm ƀòn 3, thôn 12, xã Ea Kmut, kơnhoàl Ea Kar, là cau măi rơndeh pơn diang phan bơh Công ty pơn diang phan Bưu chính viễn thông Con đường xanh. Cau do ờ hềt gĭt loh tiah gơtờp mờ geh bơta kòp ntrờn tus uă tiah kòp bè Ninh Thuận, Bình Thuận, Phan Thiết, ƀòn dờng Hồ Chí Minh, Đà Nẵng, Gia Lai. Bè hơ̆, kờp tus 5 jơ mho ngai òr (02/08), càr Dak Lak neh geh 265 nă cau geh gŏ mờ virus Sars CoV-2, tàm hơ̆ gam sơm kòp 258 nă, 07 nă cau neh sơm bời mờ ờ geh cau gơtìp chơ̆t.

Cau mblàng Ndong Brawl