VOV4.K’ho- Càr Dăk Lăk ngai 24/11 neh dờp geh 64 rbô 250 ding sơnơm vaccine Comirnaty bơh Pfizer mờ BioNTech dê bơh Bộ Y tế pà nàng lam lơh cit ai kơnòm dềt bơh 12 tus 17 sơnam in. Càr geh lam lơh cit khà sơnơm vaccine do tàm nhai 11 do tơn. Jat tàm khà sơnơm vaccine geh pà, Dăk Lăk geh lam lơh broă cit jat broă cit jơh dùl bă tiah hơ̆ sồng cit tàm tiah ndai ai kơnòm dềt jat sơnam bơh dờng mù tus dềt in.

Bè hơ̆, mờ rlau 64 rbô ding sơnơm vaccine geh pà tàm dơ̆ do, càr geh lam lơh cit ai jơh ală kơnòm bơsram kấp 3 in. Anih cit sơnơm vaccine geh lơh tàm hìu bơsram tơn, kơnòm bơsram bơh hìu bơsram lơi dê den geh cit tàm hìu bơsram hơ̆, broă lơh cit sơnơm vaccine geh gàr niam jat kơrnuat 5K bè rơcang sơndră kòp Covid-19. Tŭ do, gah lơh sơnơm càr Dăk Lăk neh bơto pơlam ai jơh ală cau lơh broă bơh ală hìu sơnơm kấp hơđơm dê in bè broă cit sơnơm vaccine ai kơnòm dềt in jat di jơnau pơlam bơh Bộ Y tế dê.

Cau mblàng K’Duẩn