VOV4.K’ho- Tềng đap bơta gơlik geh kal ke bơh kòp Covid-19 dê bơh ngai 15/9 tus tŭ do, thị xã Buôn Hồ, càr Dăk Lăk sùm sền gŏ ală mpồl cau kòp Covid-19 tàm mpồl bơtiàn ờ hềt gĭt loh bơtờp bơh tiah lơi.

              Cau lơh sơnơm gam ai mẫu xét nghiệm ai cau F1 in tàm sơnah ƀòn An Lạc, thị xã Buôn Hồ

Mho ngai 17/9, Sở Y tế càr Dăk Lăk neh pơgồp bal mờ Hìu sơnơm thị xã Buôn Hồ lam lơh ai mẫu xét nghiệm jat broă lơh test mhar mờ RT-PCR gơwèt mờ làng bol tàm 4 sơnah ƀòn gam là tiah pơhìn bơtờp kòp uă ngan tàm ù tiah thị xã Buôn Hồ dê. Jat hơ̆, bơh ngai do 18/9, gah lơh sơnơm geh lơh xét nghiệm rcang lài tàm 4 sơnah ƀòn tàm ù tiah thị xã Buôn Hồ dê, tàm hơ̆ geh: Sơnah ƀòn An Lạc, An Bình, Thiện An mờ Đạt Hiếu. Tơngai ai mẫu xét nghiệm geh bơyai lơh tàm pơgap 7 ngai (bơh ngai 18/9 tus ngai 24/9). Kờp dŭ geh pơgap 33 rơbô 77 nă cau tàm 8 rơbô 917 hìu bơnhă geh ai mẫu xét nghiệm tàm dơ̆ do. Kờp tus mho ngai 17/9, thị xã Buôn Hồ geh 180 nă cau bơtờp mờ virus Sars CoV-2, 01 nă cau chơ̆t. Pal sền gròi ngan là bơh ngai 15/9/2021 tus 5 jiơ mho ngai 17/9/2021 thị xã Buôn Hồ geh sùm 47 nă cau bơtờp kòp Covid-19 mờ ală mpồl cau kòp geh gơrềng tus ală tiah blơi phan lơh geh bơh lơh sa suơn sre, plai chi tàm ù tiah dê.

Cau mblàng K’Hạnh