VOV4.K’ho- Tềng đăp bơta gơbàn kal ke bơh kòp Covid-19 dê tŭ sùm gŏ ală cau bơtờp kòp gơguh uă tàm bàr pe ngai do, Ủy ban Nhân dân càr Dăk Lăk neh lơh nền lơh tai hìu sơnơm ing sồ 2 nàng sơm kòp ai cau kòp Covid-19 in. Hìu sơnơm ing sồ 2 gơwèt Hìu sơnơm kơnhoàl Cư Kuiñ đơng lam, geh pơgăp 1 rbô 500 nơm jơnờng piam kòp, ngui anih lơh broă Hìu bơsram Chính trị càr Dăk Lăk tàm hìu sồ 01 gùng Nguyễn Lương Bằng, ƀòn dờng Buôn Ma Thuột nàng lơh.

Hìu bơsram Chính trị càr Dăk Lăk geh ngui nàng lơh Hìu sơnơm ing sồ 2

Tàm do, geh sơm kòp, sền gàr, ai ơm yah ngài cau kòp geh cồng nha đơs nền bơtờp mờ virus Sars CoV-2 geh bơta tơngŏ kòp nggờc; Dờp mờ sơm kòp ai cau kòp ờ kơn jơ̆ in mờ tàm să neh geh kòp sùm; Bơsong dong kờl mhar ală bơta kòp gơbàn tàm ală tŭ dờp, sơm kòp ai cau kòp in mờ tơnơ̆ hơ̆ lơh jăt broă lơh ntrờn hìu sơnơm jăt jơnau sồr. Hìu sơnơm ing sồ 02 geh sơnđờm lơh broă tơn bơh bồ nhai 11 nam 2021.

Cau mblàng Lơ Mu K’Yến