VOV4.K’ho- Jat anih tờm gròi sền kòp bơtờp càr Dăk Lăk yal, kờp tus ngai 18/11, gùt càr neh cit geh rlau 1 tơlak 300 rbô ding sơnơm vaccine kòp Covid-19 tàm khà kờp jơh 1 tơlak 335 rbô nă cau hơđang 18 sơnam.

Jat hơ̆, tus ngai 18/11, càr Dăk Lăk neh geh Bộ Y tế tam pà 12 dơ̆ sơnơm vaccine kòp Covid-19 mờ 1 tơlak 262 rbô 48 ding nàng cit ai làng bol bơh 18 sơnam rlau hơđang in. Dăk Lăk neh geh 88,82% khà cau bơh 18 sơnam geh cit sơnơm vaccine kòp Covid-19 ding dơ̆ 1, khà cit ding dơ̆ 2 geh 10%.

Jat ồng Nay Phi La, Kuang atbồ Sở Y tế càr Dăk Lăk pà git, nàng gàr niam cit tơl 2 ding sơnơm vaccine kòp Covid-19 ai jơh gùt làng bol bơh 18 sơnam in, mờ wèt tus cit geh 80% làng bol bơh 12 sơnam rlau hơđang in, tàm tơngai tus, càr kờñ geh pơgap 1 tơlak 800 rbô ding sơnơm vaccine. Tŭ do, gùt càr geh 236 anih cit sơnơm vaccine, tàm bơta kuơmàng gơtùi lam lơh tus 500 mpồl cit ai mờr 200 rbô nă cau in pah ngai. Gah lơh sơnơm càr Dăk Lăk neh geh broă rơndap lơh ngan ngồn ai tơl mpồl cau in nàng tŭ sơnơm vaccine rê den geh lam lơh cit di tŭ.

Cau mblàng K’Duẩn