VOV4.K’ho- Kờp tus klo ngai 25/7, broă lơh sàng goh, sền gàr tơl phan bơna tàm broă ơm kis ai làng bol mờ cau kòp in tàm Hìu sơnơm ing sồ 1 mờ tiah ơm yah ngài tơrgùm bal tàm Hìu ơm bal Đại học Tây Nguyên neh geh lơh sir jơh.

Mìng is Hìu sơnơm ing sồ 1 gam pơn jăt tai lơh niam wơl ồs đèng, dà ia tàm bàr pe tiah gơtìp ờdiơng. Bè bơtơl phan bơna măy mok, Hìu sơnơm neh jun geh 1 nơm măy xét nghiệm huyết học, dùl nơm măy sinh hoá, 1 nơm măy X-quang ntrờn làm bă tiah mờ bàr pe măy mok phan bơna ndai bơh Hìu sơnơm dờng ƀòn dờng Buôn Ma Thuột mờ Hìu sơnơm dờng tiah Tây Nguyên. Tàm mho ngai 25 mờ ngai do 26/7, Hìu sơnơm pơn jăt tai lơh niam wơl, pơs wàs rơndăp tăp sèng tiah lời ai cau lơh broă gah lơh sơnơm in; pơn jăt tai dan mờ Sở Y tế càr ai rơndeh sơnơm, măy siêu âm bồ jòi, 3 nơm măy điện tim mờ ală bơta sơnơm tơm ba...; tơrgùm mpồl cau lơh broă, bơto pơlam jơnau pal jăt, kơrnoat lơh broă, bơto pơlam wơl broă lơh rơcăng gàr tàm broă sền gàr sơm kòp ai cau kòp Covid-19 in. Digơlan tus jơh ngai 26/7 geh lơh sir jơh broă lơh rơcăng mờ geh rò cau kòp mŭt sơm kòp tàm drim ngai hìng 27/7.

Cau mblàng Lơ Mu K’Yến