VOV4.K’ho- Ngai 19/8, Dăk Lăk geh khà cau bơtờp kòp Covid-19 uă ngan rlau jơh kờp bơh tŭ kòp pa bơtờp tàm càr dê. Tàm khà 56 nă cau geh sền gŏ, geh tus 47 nă cau kòp tàm 1 mpồl cau bơtờp tàm mpồl bơtiàn. Jat Sở Y tế càr Dăk Lăk yal, mpồl bơtờp kòp tàm mpồl bơtiàn pa ngan rlau jơh bơh càr dê, sền gŏ tàm ƀòn Kwang A, xã Cư Bao, thị xã Buôn Hồ. Kờp tus mho mang ngai 19/8, khà cau bơtờp kòp Covid-19 tàm mpồl cau bơtờp kòp do neh geh 46 nă cau F0.

Dăk Lăk: sền gŏ 47 nă cau bơtờp kòp Covid-19 tàm mpồl bơtiàn

Ồng Nay Phi La, Kuang atbồ Sở Y tế càr Dăk Lăk đơs là, bơta lòt rê tàm mpồl cau bơtờp kòp do là ờ hềt loh làng. Nàng lơh nền ngan, kờñ pal geh tai jơnau yal bè ală cau măy rơndeh dờng neh tus tiah lơh sa suơn sre Cư Bao dê. Kờp bơh bồ nhai 7 tus tŭ do, neh geh 6 kơnhoàl, thị xã, ƀòn dờng tàm càr sền gŏ ală mpồl cau bơtờp kòp bơh 10 nă cau rlau hơđang. Tàm hơ̆, ƀòn dờng Buôn Ma Thuột geh 2 mpồl cau bơtờp kòp, kờp jơh là 30 nă cau kòp. Thị xã Buôn Hồ mờ ală kơnhoàl: Cư Kuin, Krông Bông, Krông Pách, M’Đrak, tơl tiah geh 1 mpồl cau bơtờp kòp, kờp jơh geh 155 nă cau kòp. Kơnờm di tŭ cang tiah kơryan kòp, jòi gĭt tiah lòt rê, xét nghiệm, uă ngan khà mpồl cau bơtờp kòp tàm Dăk Lăk neh geh kơryan tơnơ̆ 14 ngai wàng se kơryan kòp.

Cau mblàng K’Hạnh