VOV4.K’ho- Jat Mpồl đơng lam rcang sơndră kòp Covid-19 càr Dăk Lăk yal, tàm ngai 08/8, gùt càr sền gŏ tai 20 nă cau bơtờp mờ virus Sars CoV-2 tàm 6 kơnhoàl mờ ƀòn dờng. Tàm khà 20 nă cau geh sền gŏ tàm ngai 08/8, geh 14 nă cau geh sền gŏ tàm mpồl bơtiàn, tàm hơ̆ geh 3 nă cau tàm kơnhoàl M’Drak ờ hềt gĭt bơtờp bơh tiah lơi, geh Hìu sơnơm kơnhoàl sền gŏ bơh broă xét nghiệm sac rơwah pah dơ̆. Geh gơrềng tus ală cau kòp pa do, tàm mang ngai 07/8, Hìu sơnơm kơnhoàl M’Drak neh wàng se kơryan kòp ing  ală hìu B3 (tàm hơ̆ geh Khoa Hồi sức-Cấp cứu mờ Khoa Nội-Nhi -Nhiễm). Jơh ală kuang bàng lơh sơnơm, cau kòp, cau hìu bơnhă cau kòp dê geh ai ơm yah ngài tàm dùl bă tiah mờ geh ai mẫu xét nghiệm mhar kòp Covid-19.

 Khoa Nội - Nhi -Nhiễm gơwèt Hìu sơnơm kơnhoàl M’Drăk wàng se kơryan kòp ing nàng rcang sơndră kòp Covid-19

Kờp tus 5 jiơ mho ngai 08/8, càr Dăk Lăk neh geh 391 nă cau bơtờp mờ virus Sars CoV-2, tàm hơ̆ gam sơm kòp ai 376 nă cau in, 14 nă cau neh bời kòp mờ 1 nă cau chơ̆t.

Cau mblàng K’Hạnh