VOV4.K’ho- Mờ rơlao 260 nă cau gơtìp kòp Covid-19 geh gŏ mìng tàm tơngai ờ jŏ, kơnhoàl Krông Búk là tiah geh khà cau gơtìp kòp Covid-19 uă ngan càr Dăk Lăk dê. Ală cau kòp do mìng gơrềng tus mờ tiah kòp tàm ƀòn Drao, xã Cư̆ Né. Bơta tờm là tài làng bol ờ lơh jăt nền nòn jơnau sồr 5K tàm broă rơcang sơndră mờ kòp gơtờp. Tŭ do, kơnhoàl Krông Búk gam tơnguh broă xét nghiệm, tam cah jơh nàng ală cau gơtìp kòp tàm mpồl bơtiàn mờ gròi sền nền nòn bal mờ broă dong kờl làng bol iang nùs lơh jăt broă tam cah ngài mpồl bơtiàn, pơgồp bal tàm broă kơrian mờ kòp gơtờp.

Tus wơl ƀòn Drao, xã Cư̆ Né, kơnhoàl Krông Búk dơ̆ 2, bol añ sền gŏ loh làng broă rơcang lài tŭ tìp mờ cau krơi, nùs nhơm ờ sŭk bè kòp gơtờp bơh tơl nă làng bol tàm anih ai mẫu xét nghiệm mhar kòp Covid-19.

Ồng Y Krú Ayun gam lam sồr làng bol lơh jăt jơnau sồr 5K nàng rơcang sơndră mờ kòp Covid-19

Gùt dar anih ai mẫu do, geh uă hìu jòng til mpồng jơh, tềng gah hìu là bă ù tam blơn bơtăng plai neh rơmit tài dum, rơnda bùñ căt uă ngan cồng mơya ờ geh cau pĭc. Tài cau tờm hìu là ală cau F0 neh geh cèng lòt sơm kòp Covid-19.

Ồng Y Krú Ayun, Phó Bí thư Chi bộ, Kuang atbồ mpồl lơh broă Mặt trận ƀòn Drao pà git, 155 nă cau F0, mờ rơlao 300 nă cau F1, geh mờr 1 bơnah 3 khà kờp làng bol kis tàm ƀòn pal lòt sơm kòp mờ tam cah is tơrgùm bal là bơta mờ ờ geh cau lơi kơ̆p kờñ. Gơtìp gơtờp kòp tài bơh broă geh ờ uă cau bơyai lơh ñô sa mờ jà cau pròc mhàm, cau kis tàm ƀòn bal tus bal. Ală ngai do, ală mpồl lơh broă tàm ƀòn pơgồp bal mờ mpồl lơh broă lam lài, Mpồl kòp Covid mpồl bơtiàn tus tơl hìu nàng lam sồr làng bol bañ tơrgùm gal cau, lơh jăt nền nòn jơnau sồr 5K nàng rơcang sơndră mờ kòp gơtờp. Mờ gùng dà broă lơh “lam sồr sùm hơ̆ sồng geh cồng nha”, jơh ală làng bol kis tàm ƀòn neh wă mờ lơh jăt nền nòn. “Tŭ do jăt bè bơhiàn bơh kòn cau dê, jơh ală cau tàm ƀòn, tàm kơnhoàl, tàm xã di lah pơn drờm mờ lài do là ờ di ngan. Lài do is, tŭ do is tài gam gơtìp kòp gơtờp bè do. Tơmù jơh, di lah gơtìp geh cau chơ̆t là pal tơmù jơh, bañ lơh bè lài do tai. Bơh tŭ gơtìp kòp do, làng bol ngòt ngan, làng bol lơh jăt nền nòn ngan ală kơrnoăt geh ai”.

Cau lơh sơnơm ai mẫu xét nghiệm mhar dơ̆ 2 ai làng bol kis tàm ƀòn Drao in

Ồng Trần Thuận, Kuang atbồ hìu sơnơm kơnhoàl Krông Búk pà git, tàm 2 poh do mpồl lơh sơnơm neh lơh ngan pờ ơnàng broă jòi cau mờ xét nghiệm mpồl bơtiàn dơ̆ sơnrờp. Bơh tŭ hơ̆, neh xét nghiệm geh rơlao 6 rơbô nă cau kis tàm ală ƀòn tàm xã Cư̆ Né mờ Cư̆ Kpô. Tàm tơngai gam wàng se ờ uă ƀòn mờ gùt kơnhoàl gam lơh jăt Chỉ thị sồ 16 bơh Thủ tướng Chính phủ, gah lơh sơnơm pơgồp bal mờ ală mpồl sền gròi ală ƀòn “kơrian tàm dơlam, kơrian bơh dìh bơdìh” mờ pơn jăt tai ai mẫu xét nghiệm rơwah dơ̆ 2 tàm ală ƀòn geh uă cau gơtìp kòp. Broă ai mẫu xét nghiệm geh hòi tơl nă cau tàm tơl hìu, bañ lời ờ tơl dùl nă cau lơi nàng tam cah is cau F0 lik bơdìh mpồl bơtiàn.

Ồng Trần Thuận pà git, tŭ do kơnhoàl Krông Búk gam bơ̆t bơtàu gùng dà broă xét nghiệm mhar virus Sars CoV-2 ai gùt làng bol, tàm hơ̆ ai lài lơh gờñ ngan gơwèt mờ 4 rơbô nă làng bol kis tàm tiah đah tô kơnhoàl dê, do là tiah rềp bal bơh 2 xã gơtìp kòp: “Tŭ do tiah đah tô kơnhoàl Krông Búk gam kơrian bơh 2 tiah gơtìp kòp là Ea Nam mờ xã Cư̆ Né mờ tŭ do geh ờ uă làng bol gơtìp kơrian tàm tiah hơ̆ ờ hềt geh cau gơtìp kòp. Di lơlan dùl ngai lơi den tàm broă tìp bal bơh ƀòn do mờ xã do xã ndai den tàng he ai lài broă xét nghiệm mhar tàm mpồl bơtiàn den geh gŏ tàm mpồl bơtiàn niam rơlao”.

Kờp tus tŭ do, kơnhoàl Krông Búk neh dờp geh rơlao 260 nă cau geh gŏ mờ virus Sars CoV-2. Tàm hơ̆ pal kah ngan là 2 mpồl cau gơtìp kòp tàm xã Cư̆ Né mờ xã Cư̆ Kpô. Mìng is tàm xã Cư̆ Né neh geh tus 202 nă cau F0, mìng tơrgùm tàm ƀòn Drao mờ ƀòn Ktơng Drun. Jăt ồng Hoàng Kiên Cường, Chủ tịch UBND kơnhoàl Krông Búk yal, tềng đăp mờ ală bơta kal ke bơh kòp Covid-19, kơnhoàl neh đơng lam ală mpồl lơh broă, gơnoar atbồ xã bal mờ broă gròi sền nền nòn ală broă gròi sền, wàng se ală tiah gơtìp kòp pal lam sồr, git nùs nhơm bơh làng bol mờ dong kờl phan sa, phan ngui di tŭ nàng làng bol iang nùs lơh jăt ală broă tam cah is nền nòn. bal mờ hơ̆, kơnhoàl neh crơng gơs mpồl lơh broă sùm nàng dong kờl làng bol tăc phan geh lơh bơh broă lơh sa suơn sre bè plai ƀơ, plai sầu riêng tàm tơngai gơtìp kòp. Kơnhoàl kung ai hìu lơh sa kă bro ai cau lòt blơi phan geh lơh bơh broă lơh sa suơn sre làng bol in, mờ pal geh sră xét nghiệm ờ gŏ mờ virus Sars CoV-2.

Bè ală broă lơh nàng kơrian mờ kòp Covid-19, ồng Hoàng Kiên Cường pà git: “Kơnhoàl geh tơnguh ală broă yal tơngit lam sồr, dơ̆ bàr là tơnguh broă lòt sền, sền gròi, dơ̆ pe là ai kuang bàng sền gròi tàm ală ƀòn nàng lơh bè lơi bal mờ ală mpồl lơh broă tàm xã mờ bơh ală mpồl lơh broă chính trị nàng lơh niam broă atbồ nền nòn làng bol nàng gàr niam cau lơi kis tàm tiah lơi ơm tàm tiah hơ̆ nàng broă rơcang sơndră mờ kòp gơtờp kơnhoàl dê geh cồng nha uă rơlao”.

Bal mờ broă ring nùs bal bơh làng bol, ală broă lơh ngan bơh gah lơh sơnơm bal mờ broă tus bal pràn bơh gơnoar atbồ kơnhoàl, kơ̆p kờñ kơnhoàl Krông Búk geh gờñ kơrian mờ kòp Covid-19, cèng wơl rài kis lơngăp lơngai ai làng bol in.

Cau cih Nam Trang- cau mblàng Ndong Brawl