VOV4.K’ho - Bal mờ uă tiah tàm gùt lơgar, càr Dăk Lăk gam lơh ngan chồl mhar broă cit sơnơm vaccine rơcang sơndră mờ kòp Covid-19 tàm bơta kòp tàm càr do gam gơtìp kal ke ngan. Tàm hơ̆ uă ngan là broă cit sơnơm vaccine gam geh tơnguh ai ală ƀòn làng bol kòn cau, tiah lơh broă rơcang sơndră mờ kòp gơtờp gam uă bơta ờ pràn mờ gơlik geh uă tiah gơtìp kòp tàm mpồl bơtiàn.

Pa geh cit ding dơ̆ bàr sơnơm vaccine rơcang sơndră mờ kòp Covid-19, bi Y Dhuen Buôn Krông chờ hờp pà git, do neh cit sơnơm vaccine dơ̆ poan geh bơyai lơh tàm ƀòn. Tus tŭ do, jơh ală cau dờng tàm ƀòn ndrờm neh geh cit sơnơm vaccine jơh, bơh tŭ do bơta ờ sŭk bè kòp Covid-19 geh gơmù đao, ală cau geh iang nùs lơh broă sa. “Tơnơ̆ mờ tŭ cit sơnơm vaccine, bơh ngai òr tus ngai do, añ gŏ tàm să pràn kơl dang ngan, ờ gơtìp jê, añ gŏ iang nùs ngan, ờ ngòt bơta lơi jơh. Añ kung dan ưn ngài Đảng, Dà lơgar neh sền gròi, ai tơl bơta niam nàng jơh ală làng bol geh cit sơnơm vaccine, añ kung kờñ lam sồr tus làng bol là pal lòt cit sơnơm vaccine, cit nàng sền gàr să tờm he dê, ờ geh bơta lơi lơh aniai ờ”.

Mò H Pôly Êban, Phó kuang atbồ Buôn Ko Đung B, xã Ea Ñuôl, kơnhoàl Buôn Đôn pà git, tơnơ̆ mờ 4 dơ̆ gơnoar atbồ bal mờ gah lơh sơnơm bơyai lơh cit sơnơm vaccine rơcang sơndră mờ kòp Covid-19 tàm ƀòn neh dong kờl jơh 700 nă làng bol rơlao 18 sơnam tàm ƀòn ndrờm neh geh cit sơnơm vaccine. Jăt mò H Pôly đơs, lài ngan làng bol gam ngòt, ngòt tàm broă cit sơnơm vaccine mờ gơnoar atbồ, gah lơh sơnơm neh lam sồr, dong kờl làng bol neh git bơta kuơ bơh broă cit sơnơm vaccine dê. Bơh tŭ hơ̆, sơlơ tàm ală dơ̆ cit sơnơm vaccine tơnơ̆ do den làng bol sơlơ tus bal uă ngan: “Làng bol kis tàm ală ƀòn chờ hờp ngan tŭ geh cit sơnơm vaccine, làng bol chờ hờp ngan, geh ai cit là lòt làng lòt cit tơl, tàm hơ̆ uă ngan là làng bol bơh 18 sơnam rơlao hờ đang. Tŭ do, tàm ƀòn do neh geh cit sơnơm rơcang sơndră mờ kòp tơl, di gơlan gam 15% ờ hềt geh cit tài làng bol gam ngui sơnơm mờ geh kòp lài”.

Đơng lam dùl dơ̆ cit sơnơm vaccine rơcang sơndră mờ kòp Covid-19 tàm ƀòn, mò Phùng Thị Lý, Kuang atbồ hìu sơnơm xã Ea Ñuôl, kơnhoàl Buôn Đôn pà git, lài mờ hơ̆, hìu sơnơm neh pơgồp bal nền nòn mờ gơnoar atbồ xã mờ mpồl kuang atbồ sền gàr tàm ƀòn tơlik khà măt ală cau geh cit, hơ̆ sồng yal uă nàng làng bol in git loh tơngai. Tŭ do, gam là tơngai tơnhào kàl lơh sa bơh làng bol dê, den tàng broă it sơnơm vaccine kung pal bơyai lơh mhar, niam nàng broă lơh bơh làng bol dê ờ gơtìp gơrềng, bè ờs tơl ƀòn lơh ngan mìng geh lơh tàm 1 ngai: “Ngan là tàm kàl tơnhào lơh sa, làng bol tŭ lơi kung ờ sŭk, kờñ cit jơh hơ̆ sồng rê lơh broă tai. Broă cit den bol añ lơh ngan tam pà cau lơh bè lơi nàng dơ̆ cit sơnơm bơdìh mờ tơngai geh uă rơlao. Bè tàm tơngai ƀùi drim bol añ gơtùi cit tus 12 jơ, ƀùi mho gơtùi cit tus 6 jơ”.

Ồng Trịnh Quang Tấn, Chủ tịch UBND xã Ea Ñuôl, kơnhoàl Buôn Đôn pà git, xã geh rơlao 13 rơbô nă làng bol mờ di pơgăp 3 rơbô 900 nă cau rơlao 18 sơnam, khà cau kòn cau geh di pơgăp 50%. Gơnoar atbồ xã chờ ngan tŭ tơngai pa do khà sơnơm vaccine rơcang sơndră mờ kòp Covid-19 geh tam pà uă, dong kờl khà cau geh cit tơl gơguh mhar. Tŭ do gam là cit dơ̆ 4 mờ tơnơ̆ mờ dơ̆ do, mờr 100% khà cau rơlao 18 sơnam kis tàm xã neh geh cit tơl sơnơm vaccine. Jăt ồng Tấn yal, nàng tơl ƀùi cit tàm ƀòn geh niam ờ do ờ dă, geh cồng nha mờ gàr niam di jăt mờ jơnau kờñ tàm broă rơcang sơndră mờ kòp, xã neh hòi jà jơh gùt mpồl lơh broă chính trị tus nàng lam sồr mờ bơto bơtê làng bol lòt cit di tŭ, gàr di bơta ngài, gàr niam jăt mờ jơnau sồr 5K. “Mpồl đơng lam xã, mpồl đơng lam konhoàl sền gròi ngan, đơng lam nền nòn, hơ̆ sồng sơndră mhar bơh ƀòn, geh lam sồr mờ dà yoan bal mờ dà kòn cau Rơđê, tơl hìu den bol añ kung ai sră nàng ală hìu lơh jăt mờ broă rơcang sơndră mờ kòp gơtờp”.

Cau cih Công Bắc- Cau mblàng Ndong Brawl