VOV4.K’ho - Ngai òr (30/07), tàm tiah sơm kòp cau gơtìp kòp Covid-19, Sở Y tế càr Dak Nông neh jào sră rê bơh hìu sơnơm ai cau kòp sồ 40924 in. Cau kòp do là cau klao sồ 40924 sơnđan là V.H.L.E là cau măi rơndeh (deh nam 1991, kis tàm ƀòn Mỹ Long, xã Mỹ An, kơnhoàl Chợ Mới, càr An Giang).

                Cau kòp Covid-19 neh geh sơm bời mờ rê boh hìu sơnơm tàm càr Dak Nông

Tơnơ̆ mờ dùl tơngai sơm kòp, cồng nha xét nghiệm virus Sars CoV-2 bơh cau kòp tàm ală ngai 19 nhai 7, 26 nhai 7 mờ 28 nhai 7 pà gŏ ndrờm geh cồng nha ờ gŏ mờ kòp. Tus ngai 29 nhai 7, cau kòp do neh tam cah is 15 ngai mờ geh cồng nha 2 dơ̆ xét nghiệm RT-PCR ờ gŏ mờ kòp pơn jăt tơn, să jan neh niam mờ neh tơl pràn nàng rê bơh hìu sơnơm. Tŭ do tiah sơm kòp cau kòp Covid-19 càr Dak Nông bơh ngai 09 nhai 7 tus tŭ do neh dờp mờ gam sơm kòp 30 nă cau kòp in. Tŭ do bơta pràn kơl dang să jan bơh ală cau kòp gam tai geh ring niam, geh uă cau neh geh cồng nha xét nghiệm ờ gŏ mờ kòp bơh 1 tus 2 dơ̆. Kung tàm ngai bal, càr Dak Nông neh gŏ tai 4 nă cau gơtìp mờ kòp Covid-19, tơnguh khà cau gơtìp mờ kòp tàm càr do tus 59 nă.

Cau mblàng Ndong Brawl