VOV4.K’ho- Mho ngai 22/7, càr Dăk Nông gŏ cau dơ̆ 19 bơtờp kòp Covid-19 tàm mpồl bơtiàn. Do là cau kòp ờ hềt gĭt loh bơtờp bơh tiah lơi. Cau kòp là cau ùr sơnđan măt N.T.B, deh nam 1975, ơm tàm tổ 2, sơnah ƀòn Nghiã Tân, ƀòn dờng Gia Nghiã, càr Dăk Nông. Cau kòp geh gŏ tàm dơ̆ kham sac rwah kòp tàm Hìu sơnơm dờng càr Dăk Nông, xét nghiệm test mhar kháng nguyên virus Sars CoV-2 mờ gơ ai cồng nha bơtờp mờ kòp, pơn jăt tai geh ai mẫu pơyua tus Anih tờm Gròi sền kòp tê jê să càr xét nghiệm RT-PCR ai cồng nha bơtờp mờ virus Sars CoV-2.

Jăt lùp tiah lòt rê, cau kòp lơh broă kă bro phan, mìng ơm kis tàm ƀòn lơgar lơm, geh tam tìp ơm rềp mờ ală cau măy rơndeh pơndiang phan lòt, tus mờ lòt gan ală càr geh kòp Covid-19 bè Bình Dương, Đồng Nai, Dăk Lăk. Tơnơ̆ tŭ geh cồng nha bơtờp mờ virus Sars CoV-2, gah lơh sơnơm jun cau kòp do mờ rơndeh sơnơm tus tàm tiah ơm yah ngài sơm kòp Covid-19 bơh càr dê. Ală mpồl lơh broă geh gơnoar neh sơrbac mhar lùp tiah lòt rê, jơnau bơtờp kòp mờ gŏ 24 nă cau tam tìp ơm rềp bal. Tŭ do, mpồl lơh broă geh gơnoar pơn jăt tai jòi lùp ală anih mờ cau kòp do neh geh tŭ, lòt, rê mờ ơm tàm pơgăp 14 ngai lài.

            Cau mblàng Lơ Mu K’Yến