VOV4.K’ho - Jăt mpồl đơng lam rơcang sơndră mờ kòp Covid-19 càr Dak Lak yal, tàm ngai òr (06/08), gùt càr neh dờp tai geh 17 nă cau gơtờp mờ virus Sars CoV-2 tàm 8 kơnhoàl, thị xã.

Hìu sơnơm sơm kòp jòr bơsiă gơlĭk mhàm mờ kòp klờm sơh càr Dăk Lăk jào sră rê bơh hìu sơnơm ai cau kòp sồ 51261 in

Tơnguh khà cau gơtìp kòp tàm càr do dê tus 347 nă. Mờ 6 nă cau gơtìp kòp pa tàm ngai, tus tŭ do, kơnhoàl Krông Bông neh geh 53 nă cau mờ neh gơs tiah geh khà cau gơtìp mờ kòp Covid-19 uă dơ̆ bàr tàm càr dê. Kơnhoàl Cư̆ Kuiñ gam là kơnhoàl geh khà cau gơtìp mờ kòp uă ngan, mờ 66 nă cau. Tàm khà 17 nă cau gơtìp pa geh gŏ tàm ngai 06 nhai 08 geh 3 nă cau là F1 bơh ală cau gơtìp kòp geh gŏ lài mờ hơ̆. 14 nă cau gam tai geh gŏ tàm mpồl bơtiàn, geh bơta kòp gơtờp bơh ƀòn dờng Hồ Chí Minh mờ càr Bình Dương. Bal mờ dùl ngai bal, gah lơh sơnơm càr Dăk Lăk neh jào sră rê bơh hìu sơnơm ai cau ùr gơtìp kòp sồ 51261 tàm ƀòn Năk, xã Ea Bông, kơnhoàl Krông Ana in. Bè hơ̆, càr Dăk Lăk neh geh 8 nă cau kòp Covid-19 neh sơm bời mờ geh rê bơh hìu sơnơm.

Cau mblàng Ndong Brawl