VOV4.K’ho- Bộ Y tế pà gĭt, kờp tus 6 jiơ drim ngai 13/8, Việt Nam neh sơm bời ai 89 rơbô 145 nă cau kòp Covid-19 in. Jat jơnau yal bè kòp pa ngan rlau jơh bơh Bộ Y tế dê, kờp tus tŭ do, Việt Nam geh 246 rơbô 568 nă cau kòp Covid-19, tàm hơ̆ geh 2 rơbô 395 nă cau kòp mut rê bơh lơgar ndai mờ 244 rơbô 173 nă cau kòp bơtờp tàm lơgar.

Khà cau bơtờp kòp pa sền gŏ tàm lơgar kờp bơh dơ̆ kòp bơtờp bơh ngai 27/4 tus tŭ do là 214 rơbô 603 nă cau, tàm hơ̆ geh 86 rơbô 371 nă cau kòp neh yal bời kòp. Geh 4 tàm 62 càr, ƀòn dờng neh jơh 14 ngai ờ geh cau bơtờp kòp pa tàm lơgar là Quảng Ninh, Bắc Kạn, Tuyên Quang mờ Lai Châu. Geh  8 càr, ƀòn dờng ờ geh cau bơtờp kòp tàm ù tiah tàm 14 ngai do là: Lào Cai, Kon Tum, Hà Giang, Quảng Trị, Yên Bái, Thái Bình, Bắc Giang, Hải Phòng.  Bè bơta sơm kòp ai cau kòp Covid-19 in, kờp jơh cau geh sơm bời kòp tàm lơgar he dê tus tŭ do là 89 rơbô 145 nă cau. Khà cau kòp kơn jơ̆ gam sơm kòp mờ ICU là 499 nă. Cau chơ̆t là 4 rơbô 813 nă.

Cau mblàng K’Hạnh