VOV4.K’ho- Tơnơ̆ tŭ ƀòn dờng Gia Nghĩa geh mpồl cau bơtờp kòp Covid-19 tàm mpồl bơtiàn, mang ngai 22/7, ồng Hồ Văn Mười, Chủ tịch Ủy ban Nhân dân càr Dak Nông neh kĭ tơlik Kơrnuat bè broă ngui 2, 3 broă lơh jal mhar tàm rơcang sơndră kòp Covid-19 tàm càr.

Jat hơ̆, càr Dak Nông geh kơrnuat wàng se jơh gùt ƀòn dờng Gia Nghiã bơh 12 jơ klo ngai ngai 23/7 mờ ngui tai ală broă lơh jat Jơnau sồr sồ 16 bơh Thủ tướng Chính phủ dê. Tàm mang ngai 22/7, ală anih lơh broă, mpồl lơh broă tàm ƀòn dờng Gia Nghĩa neh sồr kuang bàng, công chức, viên chức, cau lơh broă geh mat tàm anih lơh broă nàng lơh xét nghiệm Sars CoV-2 mờ xét nghiệm mhar kháng nguyên. Tus drim ngai 23/7, càr Dak Nông geh tai 8 nă cau bơtờp kòp Covid-19, tàm hơ̆ 6 nă cau kòp tàm ƀòn dờng Gia Nghĩa mờ 2 nă cau kòp tàm anih tam cah is kơnhoàl Dak Rlâp. 6 nă cau bơtờp kòp Covid-19 tàm Gia Nghĩa ndrờm là F1 bơh cau kòp là cau ùr sồ 72764 (geh bơklau, kòn ùr, kòn ƀan, sau mờ 2 nă cau kis rềp hìu) neh geh tam cah is tàm anih tam cah is ƀòn dờng dê bơh ngai 22/7. Kờp tus tŭ do, Dak Nông neh geh 27 nă cau bơtờp kòp Covid-19.

Cau mblàng K’Duẩn