VOV4.K’ho- Klo ngai, ngai 05/8, dùl nă cau ùr geh bun bơtờp kòp Covid-19 tàm càr Gia Lai neh geh ală y, bác sĩ dong kờl reh ai kòn niam dùl bă ờdo ờdă. Bác sĩ Nguyễn Tấn Phúc- Kuang atbồ Hìu sơnơm Sơm kòp ai cau kòp Covid-19 càr Gia Lai pà gĭt, cau kòp geh mã sồ 109113 rê bơh tiah kòp, sền gŏ bơtờp kòp Covid-19 mờ mut sơm tàm hìu sơnơm bơh ngai 31/7.

Cau ùr geh bun bơtờp kòp Covid-19 deh kòn ờdo ờdă

Tàm rlau 1 poh do, cau kòp geh ai lài kham pràn kơl dăng să jan tàm khà krơi is tài bơh ơm tàm nhai lồi bơh tơngai geh bun dê. Drim ngai 05/8, cau kòp geh tềl tơngŏ mờr deh, hìu sơnơm neh jà mpồl reh bơh hìu sơnơm dờng Gia Lai dê tus dong kờl. Ală y, bác sĩ neh reh ai kòn geh cồng nha, kòn klau pa deh kơn jơ̆ 3 kĭ 8. Tŭ do, hìu sơnơm neh ai dùl nă ùr đơng deh nàng sền gròi is ai cau mè mờ kòn pa deh do in, gàr niam ală bơta nàng rcang lài tàm bơtờp kòp.

Cau mblàng K’Hạnh