VOV4.K’ho - Ngai òr (30/08), gah lơh sơnơm càr Gia Lai neh bơyai lơh ai phan xét nghiệm mờ cĭt sơnơm vaccine ding dơ̆ 2 rơcang sơndră mờ kòp Covid-19 ai mpồl cau măi rơndeh tàm ƀòn dờng Pleiku in.

Broă bơyai lơh ai phan xét nghiệm mờ cĭt sơnơm vaccine rơcang sơndră mờ kòp Covid-19 geh bơyai lơh tàm tŭ ƀòn dờng Pleiku, càr Gia Lai gam ngui broă tam cah ngài mpồl bơtiàn jăt Chỉ thị sồ 16 bơh Thủ tướng Chính phủ dê. Den tàng, ală broă lơh bè rơcang sơndră mờ kòp tàm anih xét nghiệm mờ cĭt sơnơm vaccine geh lơh nền nòn ngan. Ală cau măi rơndeh ndrờm lơh jăt nền nòn broă yal lơh sơnơm, was bơta duh să jan, lơh kloh vi khuẩn mờ nggui tam cah ngài di jăt mờ jơnau sồr bơh gah lơh broă geh gơnoar dê. Tơnơ̆ mờ tŭ xét ngiệm mờ gàr niam ờ do ờ dă, ală cau măi rơndeh geh cĭt ding dơ̆ 2 sơnơm vaccine rơcang sơndră mờ kòp Covid-19. Kờp dŭ bơh ngai 30 nhai 8 tus jơh ngai 31 nhai 8, Anih tờm gròi sền kòp tê jê să càr Gia Lai pơgồp bal mờ hìu sơnơm ƀòn dờng Pleiku bơyai lơh ai mẫu xét nghiệm mờ cĭt sơnơm vaccine rơcang sơndră mờ kòp Covid-19 ding dơ̆ 2 ai rơlao 700 nă cau măi rơndeh gam lơh broă tàm ƀòn dờng Pleiku in.

Cau mblàng Ndong Brawl