VOV4.K’ho - Drim òr (19/11), jơnau yal bơh Mpồl đơng lam rơcang sơndră mờ kòp gơtờp kơnhoàl Đăk Đoa, càr Gia Lai dê, bơh broă xét nghiệm mhar, kơnhoàl do pa gŏ geh 125 nă cau geh gŏ mờ virus Sars CoV-2.

          Kơnhoàl Đăk Đoa jòi mờ gŏ 125 nă cau gơtờp mờ virus Sars CoV-2 bơh broă xét nghiệm mhar

Tàm hơ̆ geh 58 nă cau neh geh cồng nha bơh broă xét nghiệm Real time PCR geh gŏ mờ virus. Tŭ do geh 5 tàm 8 ƀòn tàm xã Hà Bầu geh cau gơtìp kòp Covid-19. Tàm do, uă tiah kòp gơtìp kal ke gam gơtìp wàng se, kơrian ing nàng jòi cau gơtìp kòp mờ xét nghiệm bè hìu bơsram cấp 1 Hà Bầu; hìu chài rơgơi mpồl bơtiàn xã Hà Bầu; ờ uă hìu tăc dà kơphe, hìu siăt sŏ tềng sơnĕ 4 gùng nhàr rềp bal đah xã Hà Bầu mờ xã Nam Yang kơnhoàl Đăk Đoa.

Mpồl đơng lam rơcang sơndră mờ kòp Covid-19 càr Gia Lai neh ai mpồl kuang bàng lơh broă tus kơnhoàl Đăk Đoa nàng pơgồp bal lơh jăt ală broă rơcang sơndră mờ kòp gơtờp. Kơnhoàl Đăk Đoa sồr làng bol lơh jăt nền nòn kơrnoăt 5K; bañ tơrgùm gal cau; di tŭ yal gơnoar atbồ in tŭ geh bơta kòp tê jê să gơrềng tus mờ ală cau gơtìp kòp, ală tiah geh cau gơtìp kòp, ha là tŭ geh tơngŏ duh să, bơsiă, glar tă nhơm.

Cau mblàng Ndong Brawl