VOV4.K’ho- Drim ngai 03/8, càr Gia Lai tàm pơn jat sùm git gŏ 39 nă cau bơtờp kòp Covid-19. Bè hơ̆, kờp jơh khà cau bơtờp kòp Covid-19 tàm càr là 111 nă. Gơ wèt mờ broă lơh tam cah is cau bơh tiah geh kòp rê, Mpồl đơng lam rơcang sơndră kòp Covid-19 yal, tàm càr tŭ do geh rlau 4 rbô 200 nă cau gam tam cah is tàm hìu mờ rlau 6 rbô 600 nă cau ndai gam tam cah is tàm ală anih tam cah is tơrgùm bal.

Tềng đap bơta gơguh uă mhar ngan bơh ală cau bơtờp kòp dê, uă ngan là cau bơh tiah geh kòp rê, càr Gia Lai geh broă rơndap lơh rơcang lài ƀồm sơnơm lơh kloh khuẩn jơh tiah gùt dar anih gròi sền kòp bơtờp tàm gùng rơndeh 14 (rbàng 110, xã Ia Le, kơnhoàl Chư Pưh), ai mẫu xét nghiệm jơh gùt làng bol, ală mpồl lơh kơnòl broă tàm tiah do; cit sơnơm vaccine rơcang sơndră kòp ai làng bol gùt dar anih gròi sền kòp bơtờp in.

Cau mblàng K’Duẩn